濶別歐聯分組賽20年，紐卡素重返聖殿，即被編入超級死亡之組，面對來自德意法強勁對手。
分組賽於周五進行抽籤，大家最關心有冇死亡之組，結果出現於F組，除紐卡素，仲有多蒙特、AC米蘭同聖日耳門。
4隊有卡士兼實力相若，每場都係必睇硬仗，尤其紐卡素新核心東拿利倒戈AC米蘭一戰，更係萬眾矚目。紐卡素於抽籤後亦自嘲一番：「睇吓我哋嘅歐聯對手……」
其他英超球隊又如何？晉級難度比紐記細好多。衛冕冠軍曼城編入G組，虎入羊群，對手只係萊比錫、年輕人、貝爾格萊德紅星，隨時出後備都可以首名出線。
講到曼城，艾寧夏蘭特就最威喇，除咗協助球隊首奪歐聯冠軍，亦大熱當選歐洲足協年度最佳球員，成為第一位得獎嘅曼城、挪威球員。今次分組對手咁弱，佢仲有機會蟬聯歐聯金靴。早兩日英格蘭職業球員協會（PFA）公布年度最佳，又係夏蘭特，22歲殺神，徹底橫掃歐洲。
同時，阿仙奴重返歐聯舞台，B組對手有西維爾、燕豪芬及朗斯，以兵工廠目前實力，出線依然樂觀。
至於曼聯，A組與拜仁慕尼黑同組，另外兩隊分別係哥本哈根、加拉塔沙雷，由於加拉塔沙雷今季大搞，又沙夏又伊卡迪，絕對唔可以睇少。而拜仁新加盟中鋒哈利卡尼，亦將會重返英格蘭，作客奧脫福。
首輪分組賽今個月19號展開，直至明年6月1號踢決賽，地點係倫敦溫布萊球場。
歐聯分組
A組
拜仁慕尼黑（德國）
曼聯（英格蘭）
哥本哈根（丹麥）
加拉塔沙雷（土耳其）
B組
西維爾（西班牙）
阿仙奴（英格蘭）
燕豪芬（荷蘭）
朗斯（法國）
C組
拿玻里（意大利）
皇家馬德里（西班牙）
布拉加（葡萄牙）
柏林聯（德國）
D組
賓菲加（葡萄牙）
國際米蘭（意大利）
薩爾斯堡（奧地利）
皇家蘇斯達（西班牙）
E組
飛燕諾（荷蘭）
馬德里體育會（西班牙）
拉素（意大利）
些路迪（蘇格蘭）
F組
巴黎聖日耳門（法國）
多蒙特（德國）
AC米蘭（意大利）
紐卡素（英格蘭）
G組
曼城（英格蘭）
萊比錫（德國）
貝爾格萊德紅星（塞爾維亞）
年青人（瑞士）
H組
巴塞隆拿（西班牙）
波圖（葡萄牙）
薩克達（烏克蘭）
安特衛普（比利時）
