【歐聯】全場0中龍 補時被波圖絕殺;唔使驚!阿仙奴複製14年前劇本 誓破16強魔咒

16強魔咒纏繞阿仙奴?今晨歐聯16強首回合賽事,喺英超以超強攻力衝擊冠軍嘅阿仙奴,作客爆冷不敵葡超波圖0:1,而且仲錄得全場僅7次射門、0中目標,係近兩年以嚟攻擊數據最曳嘅一場比賽。

包括今場在內,阿仙奴已經連續5場歐聯淘汰賽輸波,佢哋上次打入歐聯8強,已經係2010年嘅事,難怪被質疑患上歐聯淘汰賽恐懼症,踢落完全走樣、冇信心。

不過咁啱得咁蹺,上次阿仙奴殺入8強、喺16強淘汰嘅對手,正正就係波圖,當年佢哋16強首回合作客輸1:2,次回合返主場大勝5:0晉級,今次可唔可以重溫舊夢?

事實上,阿仙奴今場變動不大,進攻三叉戟繼續係馬天尼利、薩卡同托沙,不過開賽僅1分鐘,迪勤懷斯就因為飛剷對手極速領黃,令佢之後嘅比賽時間都縛手縛腳,21分鐘,波圖翼鋒加連奴勁射中柱彈出,佢再補射貼柱出界,錯失黃金機會。

換邊後雙方攻勢更少,阿仙奴即使控球率達65%,但缺乏鬥心及射門慾,繼2022年1月英足盃之後,再次錄得全場射門0中龍嘅數據。戰至補時,全場最搶鏡嘅加連奴,喺禁區外遠射入網,波圖以1:0險勝阿仙奴。

領隊阿迪達賽後總結敗因:「我哋冇威脅力,冇進取心……我哋喺有波在腳嘅時候,應該要做得好啲,而唔係好似依家咁。」次回合會喺3月12日上演,輪到阿仙奴主場出戰。