【歐聯】作客羅馬贏2:0!利華古遜距「不敗三冠王」 仲有6場;沙比:會繼續戰鬥

3冠奇蹟又近一大步!周四深夜歐霸4強首回合,德甲盟主利華古遜作客2:0挫意甲勁旅羅馬,延續全季不敗至47場之餘,闖決賽形勢大好!

利華古遜今季已打破拜仁壟斷,勇奪德甲冠軍、以及打入德國盃決賽,如今歐霸4強首回合,又作客以2:0贏波,晉身決賽機會相當樂觀,假如晉級的話,目前只餘6場賽事(3場聯賽、1場德盃決賽同2場歐霸),利華古遜就可達成不敗三冠嘅偉業。

利華上季歐霸盃喺4強被羅馬淘汰,尋晚就成功復仇,雖然羅馬開賽攻勢較旺盛,傷癒嘅盧卡古,喺22分鐘曾頭槌頂中楣;不過開紀錄嘅始終係利華,28分鐘,羅馬右閘卡斯鐸犯錯,利華翼鋒基馬度搶到個波後傳中,穫斯熨入,打破僵局。

換邊後羅馬攻勢都係入唔到肉,73分鐘,利華安特希遠射建功,鎖定2:0嘅領先優勢,次回合更有主場之利,晉級機會高唱入雲。

利華教練沙比阿朗素,賽後都承認三冠夢非常接近:「我哋今次真係好接近喇,我相信球員,佢哋嘅心態好好、比賽亦夠晒專注,我哋唔會停,會一直戰鬥。因為我哋仲有好多工作要做,我哋要繼續展現智慧、成熟嘅一面,唔可以畀機會對手翻身。」

賓菲加曾經喺1963年12月至1965年2月創下48場不敗走勢,目前利華已經47場不敗。不過據歐洲足協官方指,歷來歐洲主流聯賽最長不敗紀錄係蘇超嘅些路迪,佢哋喺1915至1917年創造62場不敗。

另一場歐霸4強首回合賽事,馬賽主場1比1打和阿特蘭大,次回合輪到阿特蘭大主場出擊。