周三凌晨歐聯第3輪，除咗曼聯麥佳亞、奧拿拿創造神奇時刻之外，以下3位球員，同樣有精彩演出，成為賽事焦點！
阿仙奴作客2:1贏西維爾，最大功臣係耶穌仔，加比爾捷西斯精彩演出，一傳一射帶領球隊全取3分。可惜頻繁傷患，始終係呢位巴西前鋒天敵，佢喺比賽中途傷出，懷疑係腿筋問題。
加比爾捷西斯受傷前嘅表現，確係技驚四座，佢先喺完半場前，一次快速反擊、巧妙轉身擺脫敵將，再傳畀馬天尼利單刀射入。換邊後佢再憑個人技術舞入禁區，燙遠柱射入世界波，係阿仙奴贏波最大功臣。
對於耶穌仔，阿迪達推崇備至：「我實在好開心，佢係真正嘅大賽球員。佢改變咗阿仙奴世界，為我哋帶嚟信念同埋力量。阿仙奴係倚靠呢類球員去贏得比賽，我哋絕對需要呢類型嘅球員。」
耶穌仔喺過去17場歐聯參與18個入球（14入球與4助攻），阿仙奴要喺歐聯爭標，實在唔可以缺少佢。
除加比爾捷西斯，佢兩個亦繼續有出色發揮！先係祖迪比寧咸又入波，助皇馬2:1贏布拉加。新天王加盟皇馬後，頭3場歐聯全部有士哥，當年C朗都做唔到。
仲有久保建英，皇家蘇斯達作客1:0贏賓菲加，雖然冇入波同助攻，但依然被選為全場最佳，因為佢喺右路不停盤扭推進，玩到對手陀陀擰，「日本美斯」唔係浪得虛名。
