不老摩迪再創神奇戰蹟！尋晚歐國聯4強賽事，克羅地亞喺加時以4:2反勝荷蘭，殺入歐國聯決賽，衝擊國家隊史上首個冠軍。當中首席功臣，又係佢：37歲嘅摩迪！
中場大師唔單止跑足全場，而且仲有1個助攻、博到1個12碼、自己操刀入埋鎖定勝局，體能同水準相當誇張。
克羅地亞連續兩屆世界盃入4強，2018亞軍、2022季軍，成績非常驕人，但喺歐國盃表現相對一般，嚟到歐國聯決賽周，佢哋面對主辦國荷蘭，賽前亦被睇低一線。
冇計，克羅地亞次次都用老將掛帥，次次都畀人彈青黃不接，但就次次都有貨交，中場依然係37歲摩迪、30歲嘅波索域，後面就有34歲比列錫、34歲嘅維達。
荷蘭喺34分鐘由馬倫先開紀錄，摩迪喺54分鐘逼到加普犯錯、博到12碼，卡拉馬歷操刀追平；72分鐘，柏沙歷為克羅地亞反超前2:1，去到補時，荷蘭又靠路亞蘭治追成2:2進入加時。
加時之王克羅地亞，越踢越醒神，柏高域先射成3:2，然後摩迪操刀12碼，鎖定4:2勝局，克羅地亞歷史性殺入歐國聯決賽，將會面對今晚西班牙對意大利嘅勝方，力爭國家隊史上首個冠軍。
其實摩迪早喺對荷蘭賽前，就暗示歐國聯決賽周，將會係佢國家隊嘅最後兩場波：「喺歐國聯結束之後，我會同領隊傾傾我喺國家隊嘅決定，不過呢一刻，唔係公佈嘅好時機。」
賽後，摩迪亦明言：「我哋一定會戰鬥到底，希望可以為克羅地亞帶嚟史上首個冠軍、夢想成真。」
