西班牙晉級，決賽惡鬥克羅地亞！西班牙尋晚喺歐國聯4強，憑祖斯奴完場前入波，以2:1絕殺意大利，連續兩屆進軍歐國聯決賽，周日深夜將會同克羅地亞爭奪今屆冠軍，合演上屆歐國盃16強翻版戰。
西班牙近年雖然星味退減，但戰鬥力其實猶在，以往安歷基執教下，著重控球而射門較少，最終喺世界盃16強付出代價，安歷基離任後，富安迪上場，強調狀態而不論名氣，球風上亦有所改變。
今仗面對意大利，強陣搶盃嘅西班牙，形勢上亦係佔優一方，開波僅3分鐘，賓奴就藉邦路斯犯錯而先開紀錄，8分鐘後，意大利射手恩莫比尼憑12碼扳平。
兩軍之後有唔少埋門，包括意軍食詐胡，摩拉達門前失機，去到完場前兩分鐘，洛迪遠射造成混亂，後備登場嘅祖斯奴把握機會絕殺，西班牙贏2:1殺入決賽。
今場MVP係啱啱踢完歐聯決賽、就趕返國家隊報到嘅洛迪，佢今場掂波120次，傳球108次、成功率96%，8次重奪控球權、4次關鍵傳送、4次射門，當中包括造就祖斯奴絕殺，表現極度搶鏡。
洛迪上星期喺歐聯決賽一箭定江山，助曼城達成三冠霸業，該場比賽，洛迪亦成為MVP。佢同拉樸達參與曼城祝捷巡遊後，就匆匆趕返國家隊，雖然只係參加咗一課操練，但洛迪表現依然係咁Sharp醒，唔到你唔服。
嚟緊決賽鬥克羅地亞，亦係洛迪同摩迪嘅中場大師對決，洛迪話：「克羅地亞係一支競爭力好強嘅球隊，而且頂尖球員為數不少，不過，冠軍就喺我哋眼前，我哋要盡全力將佢攞到手。」
