科頓包二奶包出禍！？英國多間傳媒報導，一位已有固定女友、已為人父嘅英格蘭國家隊新星，被女友揭發包二奶，女友嬲到分手之餘，仲踢呢位國腳走，唔畀佢返屋企同見囝囝。好多英國網民一睇，符合上述條件嘅人就只得曼城太子科頓，而科頓咁啱喺呢3場歐國聯都冇上陣，英格蘭對外話因為佢中咗19肺炎，有網民話：真係咁橋？
英國傳媒爆料，呢位英格蘭國腳喺對上7個月，用咗5萬5千鎊，即大約53萬港紙，包咗一位妙齡金髮女子，即係二奶啦，送小禮物、租酒店呢啲係指定動作，最離譜係疑似科頓仲會同二奶互send咸相，留低晒證據畀人周到。
據報導指，原本疑似科頓都玩得好小心，手機不離身，返屋企前仲會喪噴古龍水遮住啲味，不過有一次去沖涼嗰陣唔記得帶手機，就係咁畀女友發現，女友最嬲嘅唔係佢包二奶，而係發現疑似科頓一邊同囝囝玩、一邊send咸相，覺得好嘔心，嬲到即時踢走疑似科頓，唔畀佢返屋企同見個囝。
女友check 手機係好多巴打嘅惡夢，不過如果真係科頓，係有啲唔抵爭嘅，事關科頓個底花到得人驚，佢同曼聯衰仔格連活特試過喺踢國際賽期間，齊齊帶女返酒店開P，之後被逐出國家隊；又試過同基亞利殊蒲夜店斷正被貶後備，再咁玩落去，幾天才橫溢都搞唔掂啦！
呢單嘢堅定流都好，科頓呢3場歐國聯都冇份踢係事實，英格蘭足總話因為佢中咗19肺炎而缺操，點都好，冇咗呢位攻擊好手，攻力係爭咁啲，尋晚對意大利，英格蘭又冇波入，最終悶和，3戰不勝有降班危機。
總計呢3場歐國聯，英格蘭加埋入得一球，仲要係12碼嚟，雖然歐國聯只係包裝過嘅熱身賽，但攻力咁曳，的確令唔少球迷擔心嘅。
