英格蘭真係鑊鑊新鮮鑊鑊甘，今輪國際賽期4場歐國聯，只得2和2負都算，尋晚仲要喺主場輸畀匈牙利0:4，創下國家隊近百年恥辱；賽後英格蘭球迷喺社交網、新聞網論壇瘋狂洗板，怒叫「修夫基下台」！
4場歐國聯，第一場作客0:1負匈牙利，之後打和德國及意大利1:1、0:0，到尋晚仲大鑊，全場近7成控球，射門次數10對7，但喺主場依然狂吞匈牙利4蛋……自1928年以1:5不敵蘇格蘭後，首次喺主場淨輸4球。
計埋呢場，英格蘭暫時喺歐國聯4戰得2和2負，加埋只入1球，仲要係靠12碼，攻力極度疲弱，目前排喺A3組包尾，大有降班危機。
比賽期間，唔少英格蘭球迷喺看台大嗌「你哋都唔知自己喺度做乜」，完場後，一眾嬲到爆炸嘅粉絲，仲不斷洗板，要求修夫基下台，有英國球評家更詳列修夫基10宗罪，話佢係千古罪人！
當然，有人踩亦有人撐，哈利卡尼被問到點睇修夫基，佢好嬲咁話：「我唔會答你呢條無意義嘅問題，我哋之前嘅成績有目共睹。」
名宿加歷查，更為撐修夫基不惜同球迷開火：「你哋呢班小丑，收嗲啦！修夫基帶領英格蘭入到兩個大賽嘅決賽同4強，係1966年世界盃後嘅最佳成績！唔該你哋班球員，盡快振作，踢番自己最佳嘅水平啦！」
