尋晚歐國聯又狂吹冷風，A3組賽事，德國對匈牙利、意大利對英格蘭，兩支上盤球隊德、英齊輸，兼且同時開出入球細，令唔少捧場客損手之餘，最肉酸係英格蘭，堂堂星光大軍竟然降落B級聯賽，咁嘅表現踢世界盃，點令人有信心呀？
先講德國對匈牙利，德國呢場波係主場，本應係主動壓住嚟攻吖，但竟然喺17分鐘，畀匈牙利一次角球攻勢，由施沙拉爾「蠍子擺尾」射門建功，匈牙利繼上次對賽後，再一次領先。德國落後下入肉埋門都係唔多，最終無力回天輸0:1，德國主帥費歷克領軍14場後，終於第一次輸波。
至於匈牙利就極威水，繼上場4:0大炒英格蘭後，今場再小勝德國，兩鬥世界冠軍1球不失，目前喺A3組以10分居首，下場對意大利只要唔輸就可以出線。
另一場A3超級大戰，意大利再對英格蘭，眾所周知，英格蘭最大弱點係領隊修夫基，中堅麥佳亞今季4次為曼聯正選上陣，4次都輸晒，但修夫基偏向虎山行，執意用狀態不足嘅麥佳亞做正選，結果係「求仁得仁」。
英格蘭為避免降班，今場已經係精銳盡出，亦有機會就係世界盃嘅正選陣容，門將尼克普比，後面迪亞、麥佳亞同基爾獲加，一對翼衛係saka、列斯占士，中場中迪勤懷斯、祖迪比寧咸，前線史達寧、菲爾科頓支援卡尼，絕對係星光熠熠。
但場波踢落，無星意大利反而氣勢更勁，而英格蘭則無神無氣，卒之喺68分鐘，意大利憑拿玻里22歲新星拉斯柏度尼建功，以1:0氣走英格蘭。
英格蘭5戰得2分，尾3嘅德國有6分，換言之，輸埋今場，星光熠熠嘅英格蘭就已篤定降班，來季歐國聯會喺B級角逐。歐國聯都算，如果修夫基打算以今場作為世界盃預演，就更加得人驚，人腳已經咁靚，都唔知可以點執，唯一肯定可以做嘅，就係積極考慮唔再選麥佳亞入伍囉。
