世界盃開鑼在即，但一眾歐洲勁旅喺強陣出擊之下，仍然喺歐國聯爆冷、先後出事，究竟佢哋係留力吖，定真係甩轆？
尋晚A1組，要搶分護級嘅法國作客丹麥。雖然話就話歐國聯無關痛癢，但堂堂世界盃冠軍跌落B級，的確超肉酸，所以主帥迪甘斯今場都出強陣，前面基沙文、基奧特配麥總，係防線叫做試新人，用沙列巴、烏柏美卡奴同巴迪亞沙尼，點知就係呢條防線出事。
開賽後法國場面上係佔優，但丹麥喺33分鐘就搵到缺口，多爾貝治接應傳中，無人看管下撞入；6分鐘之後一個角球攻勢，法國守將解圍不遠，奧臣狂抽破網成2:0，之後法國狂攻不果，最終輸波，好彩嘅係另一場克羅地亞幫手贏奧地利3:1，法國先唔使降班。
計計埋埋，法國由3月到依家近6場波，竟然只得1勝2和3負，而且今場嘅法國，除咗防線，中前場基沙文、麥總、柏華特、曹亞文尼等基本上就係世界盃主力，咁嘅表現，的確令人擔心。
另一支歐洲熱門比利時，今場亦精銳盡出撼荷蘭，係盧卡古養緊傷，其餘球星迪布尼、夏薩特、韋素、古圖爾斯等等悉數披甲，但無論攻勢入肉程度、場面控制都不及荷蘭。
反而荷蘭今場有迪比同法蘭基迪莊避戰，前面只用雲素贊臣拍貝雲積，但一樣夠做，喺73分鐘，由VVD藉角球一箭定江山，1:0氣走比利時。
英格蘭衰到降班，德國、西班牙、法國同比利時亦喺派出大部份主力下輸波，睇近態的話超唔對辦，咁邊隊最似樣？就咁睇，應該係荷蘭。
荷蘭自從方丈尹戈爾回巢後，15場波11勝4和未輸過，單計近6戰亦5勝1和、雙殺比利時，強勢闖歐國聯4強，最重要係Keep住呢個氣勢踢世界盃。方丈喺2014世界盃曾帶領荷蘭拎季軍，今屆唔知有冇機呢？
