歐國聯A3組最後一輪，英格蘭、德國上演例行公事，因為兩隊防線水鬥水，變成入球大戰，最終3:3打和。麥佳亞表現穩定，穩定地繼續充當送禮專家，堅持用佢打正選嘅修夫基，仲可以硬頸幾耐？
喺主場對德國前，英格蘭5場歐國聯賽事，成績只為2和3負；防守固然欠穩，修夫基決意重用麥麥送，兩人同時成箭靶；前面亦冇晒力，連埋熱身賽，7.5小時未入過波，近63個射門，除12碼外，冇辦法造成入球；難怪好多英格蘭球迷，高呼要換走修夫基，否則世界盃會死得好慘。
同上仗0:1負意大利相比，修夫基作出少少改動，史東斯代替基爾獲加打中堅，勞基梳爾則任左翼衛。英格蘭防線差，其實德國亦唔好得幾多，上半場已經漏洞頗多，史達寧有兩個黃金機會，但佢無改快樂足球特色，全部錯失。
下半場上演入球大戰，英格蘭先失兩球，又係麥麥送孭大鑊，先係52分鐘喺禁區頂交失波，然後回防時喺禁區內踢跌對手，被罰12碼，根度簡射成1:0。67分鐘，麥麥送又喺中場失球，德國快速反攻，最後由夏維斯禁區外射入靚波。
德國藉對手防線失誤領先兩粒，但跟住輪到佢哋發夢，71至83分鐘內，竟然畀勞基梳爾、美臣蒙特、哈利卡尼入波，變為落後2:3。英格蘭難得識入波，但始終無法贏番場，門將尼克普比87分接波甩手，畀夏維斯輕鬆執死雞，射成3:3完場。
場波咁好睇，拜兩隊豆腐防線所賜，英、德領隊修夫基、費歷克，11月世界盃可唔可以執番正個後防？當然最大疑問，仲係麥佳亞會唔會繼續做正選，修夫基條頸真係咁硬，可以無視球迷強烈嘅呼聲？
精華傳送門：
另外兩支A3組球隊，冇份踢世界盃，但要爭歐國聯出線席位，結果意大利作客2:0挫匈牙利，3勝2和1負11分成為小組首名，打入4強；門將當拿隆馬連環神救，係意大利贏波首席功臣。
匈牙利功虧一簣，3勝1和2負10分，飲恨第2，但呢隊波喺死亡之組發揮超級黑馬本色，未來值得期待。德國1勝4和1負7分排第3，英格蘭3和3負3分，包尾降級。
