將熱身賽pack埋一碟嘅歐國聯，雖然得迪布尼日前打開口牌，話呢個賽事絕無意義，但落到場，班球星亦用雙腳話你知，真係未必會同你搏命。
前晚3場A級歐國聯賽事，法國、克羅地亞同比利時，全部輸波輸盤，到尋晚英格蘭作客匈牙利，又係輸波收場，嚟緊第二輪，會唔會又係咁㗎？
各大主流聯賽啱啱收爐，一眾國腳辛苦足成季，不過仲未有得放暑假，因為歐國聯又開打。講真，呢個賽事一向都被球圈人士批評，大大加重球員嘅比賽負擔，得益嘅只係uefa。冇計，入選咗國家隊而又想提早放假的話，除咗受傷，似乎別無他法喇。
前晚法國不敵丹麥1:2、克羅地亞被奧地利炒3蛋，比利時1:4大敗予荷蘭，到尋晚，英格蘭亦以0:1不敵匈牙利。
英格蘭今場有卡尼孭飛，查洛保雲處子戰即正選，中場又有迪勤懷斯、祖迪比寧咸、阿諾特等等，絕對係年輕有星味。可惜踢落完全唔係嗰回事，匈牙利反擊更有威脅，66分鐘，後備上陣嘅列斯占士輸12碼，匈牙利王牌蘇保斯拉爾中鵠，匈牙利最終小勝1:0，打破近60年15次對賽未贏過嘅宿命。
當然，牌面較弱嘅一方贏波，絕對值得嘉許，但一眾強隊主力，即使唔係Hea踢，亦明顯攰到爆，嚟緊仲有兩輪要打，跟手8月頭又開咧，到11月就到世界盃開打，賽程密到得人驚。
冇錯，可能有球迷話食得咸魚抵得渴，球員收咗人工就要做嘢，呢個不作討論。不過作為球迷或足球投注人士，對歐國聯真係唔好太高期望，小注怡情，當佢係熱身賽咁睇就ok，如果第二日要早起返工，不如認真考慮吓早啲瞓啦！ 文：King Sir
