【歐國盃】5:1!德國揭幕戰大炒蘇格蘭 利華拜仁21歲雙星 拍住入波創兩大紀錄

國際大賽衰咗咁耐,今次做主辦國,梗係唔衰得。2024歐洲國家盃決賽周今晨開戰,東道主德國大開殺戒,喺A組以5:0大炒蘇格蘭,表現相當唔錯,顯示爭標實力!

當然,你可以話蘇格蘭冇料啫,但德國今仗中前場配合得堅好,無論靈活性同組識性,踢出近年國際大賽佳作。日耳曼戰車近兩屆世界盃都係分組賽出局,上屆歐國盃亦僅16強止步,今次藉主場之利,相信會重返爭標行列。

利華古遜今季創不敗神跡稱霸德甲,球員當起信心強,揭幕戰3人正選,分別係中堅泰希、防守中場安特列治、攻擊中場域斯。其中域斯被視新攻擊核心,配合根度簡、穆斯亞拿,後上支援單箭頭夏維斯,仲有老將卻奧斯控制節奏及舖橋搭路,準繩長傳不斷拉開兩翼,令蘇格蘭防線露出唔少空位。

開賽10分鐘,今屆第1個入球出現,正正係卻奧斯準確長傳右路,右閘甘美治助攻傳中,域斯移入中路射門破網。一項紀錄誕生,域斯以21歲42日,成為德國隊喺歐國盃最年輕入球球員。

19分鐘,輪到穆斯亞拿接應夏維斯回傳,近門勁抽成2:0。入波嘅域斯同穆斯亞拿都係21歲,由此又一項紀錄誕生,德國隊成為歐國盃歷史上,首支有兩名21歲及以下球員,喺同一場比賽取得入球嘅球隊。呢對年輕前線雙核,將會係徳國未來賽事兩大殺著。

蘇格蘭頂唔住德國攻勢,之後門前仍險象橫生,去到45分鐘唔止輸多球,仲打少個。中堅保迪奧斯鞋底剷跌根度簡,被罰離場兼輸12碼,夏維斯射成3:0完半場。

德國勝券在握,下半場繼續圍攻,全場射門高達20次,10次中目標。多蒙特長人中鋒富克洛後備射成4:1。蘇格蘭全場0射門,87分鐘靠魯迪格「擺烏龍」破蛋,德國另一後備安利簡恩補時射成5:1完場。

同組瑞士、匈牙利周六晚9時碰頭。利華古遜冠軍功臣格列沙加係瑞士中場核心;匈牙利中場亦有利物浦嘅蘇保斯拉爾,佢兩個鬥法係今場最大賣點