【歐國盃】16歲仔踢決賽周 耶馬創歷史!西班牙重用幼齒 3蛋送老人兵團

16歲你做緊乜?佢已經踢緊歐洲國家盃決賽周,仲有助攻添!

周六晩歐國盃B組,西班牙對克羅地亞,以為勢均力敵,點知完全唔喺嗰回事,西班牙大勝3:0,其中一個原因,係後生無敵,贏晒活力。

鬥牛兵團今場用咗唔少後生仔,包括21歲巴塞中場柏迪、21歲畢爾包前鋒尼高拉斯威廉斯,更出位係正選有巴塞另一超級青訓產品耶馬。佢只有16歲338日,成為歐國盃歷史上最年輕出場球員,打破波蘭中場科茲沃夫斯基上屆所創紀錄(17歲246日)。

有佢3個,夠晒活力,全場逼搶令克羅地亞抖唔到氣,37歲中場核心莫迪歷,上半場掂波機少到爆。29至32分鐘,西班牙連入兩球,巴黎聖日耳門中場法比安彭拿放出靚直線,中鋒摩拉達發揮毒蛇本色,突破越位單刀射入。3分鐘後法比安彭拿自己嚟料,禁區邊左cup右cup,再射強勁地波入網。

克羅地亞反攻,有兩個危險攻門,未能把握之餘,更喺補時兩分鐘輸多球。耶馬右路傳中,皇馬右後衞丹尼爾卡華積,繼歐聯決賽又移入中路取得士哥。西班牙上半場領先3:0。

6個克羅地亞中前場球員,5個超過30歲,好聽夠經驗,即係青黃不接喇!佢哋下半場畀到壓力唔算大,令西班牙經常搓住嚟踢。去到比賽末段,藉西班牙門將烏尼西蒙失誤,克羅地亞得到12碼,但般奴柏高域主射被救出,接應隊友傳中補射入網,又被吹罰越位,整定克羅地亞淨吞3蛋。

克羅地亞今場除咗冇波入,亦冇角球,冇1次能夠成功落底傳中,場面都幾難睇。