【歐國盃】12碼+後備神兵絕殺;劣勢下淘汰荷蘭 英格蘭名宿由彈變讚 修夫基:光榮!

唔通真係整定?英格蘭周四凌晨4強大戰,又係處於劣勢,憑問題12碼,以及90分鐘後備奇兵屈堅斯入波,2:1淘汰荷蘭,打入決賽。周一凌晨3時,會同西班牙爭冠軍。

荷蘭同英格蘭陣容上都冇乜變動,荷蘭喺7分鐘有個夢幻開局,沙維西蒙斯搶甩迪勤懷斯控球,禁區外勁射世界波入網,領先1:0。

英格蘭之前被批評進攻冇板斧,今場稍有改善,起碼中前場爽咗,18分鐘已經扳平。但呢個入波有爭議性,當時哈利卡尼禁區內射門,荷蘭右閘杜費斯出腳攔截,同哈利卡尼有碰撞,球證起初冇表示,但之後被叫去睇VAR,決定判罰12碼,隊長親自主射,為英格蘭扳平。

呢個12碼連自己友都唔幫拖,加利尼維爾做評述時咁講:「以我作為後衞角度去睇,呢個12碼判罰,絕對係羞恥。」雙方之後各有入波機會,菲爾科頓今仗終於嚟料,上半場製造唔少威脅,一次射門睇住必入,畀杜費斯白界線上解圍。杜費斯接應角球頭槌攻門又頂中楣,上半場打和1:1。

半場兩隊作出變動,荷蘭再出長人中鋒韋格荷斯,英格蘭亦以勞基梳爾入替捷比亞。下半場英格蘭故態復萌,推進慢晒,畀荷蘭取得主動,製造幾個中目標攻門,但未有斬獲。

英格蘭80分鐘有布卡約沙卡近門撞射入網,但畀波嘅基爾獲加僅僅越位食詐糊。81分鐘,英格蘭領隊修夫基又有出人意表調動,一次過調走科頓、哈利卡尼,換入高爾彭馬、屈堅斯。

你真係吹佢唔脹,英格蘭整個下半場都冇攻勢,頂到90分鐘,以為又要加時,點知畀佢搞掂,入球者正係屈堅斯,呢位維拉前鋒一個轉身射門,遠柱入網,而助攻者則為彭馬。英格蘭2:1贏荷蘭,入決賽鬥西班牙。

之前冇人撐嘅修夫基,賽後獲名宿舒利亞大讚調動「完美」:「係,修夫基成日都受到批評,不過佢今次調動完美,真係值得讚許。」至於老舒拍檔瑟頓,亦激讚基gor敢換走卡尼,調動大膽兼頂級。

賽後,修夫基當然High到爆啦:「英格蘭第一次喺主場以外踢大賽決賽,真係非常光榮!今屆歐國盃最佳球隊係西班牙,雖然比賽將會非常艱難,但我都想贏埋佢!」