【歐國盃】防線史上最差!史帥孭鑊!意大利0:2負瑞士 衞冕冠軍16強出局 當拿隆馬致歉有骨

輸得肉酸!意大利周日凌晨歐國盃16強首仗,畀瑞士完全輾壓,衞冕冠軍輸0:2出局。冇期望意大利有強大攻力,但今場連防線都弱到痹,連繫性同速度都輸晒,唔敢想像呢隊竟然係意大利,一代強隊,真正人才凋零。

「我哋只能夠向大家道歉。今日我哋真係好失望,成場波我哋都喺度掙扎,除咗佢哋墮後、放棄控球之後,我哋先拎到主動權,但講真,我哋其實應該早啲採取行動……瑞士贏得合理,所以都無話可說喇。」當拿隆馬除咗道歉,更暗示史巴列堤反應太慢。

意大利分組賽表現極差,極夠運先壓倒克羅地亞出線。嚟到16強,領隊史巴列堤大變陣,除咗出「小法魯」艾沙拉維,拍費達歷高基艾沙、施卡馬卡三箭頭攻堅,同上仗正選陣容共有6個變動。但從結果論嚟睇,史巴列堤要孭大鑊。

意大利出名防守叻,但成班球員今仗被迫打守勢波時,經常都係得個睇字,瑞士每次組織進攻,閒閒哋搓廿幾腳波,梗係越踢越順。去到37分鐘,正係搓出意大利防線空位,中場富拿插入禁區,控波睇定為瑞士射成1:0。

換邊後以為會有改善,但意大利球員真係發緊夢,下半場開波只有35秒,繼續眼部防守,睇住瑞士前鋒魯賓華加斯禁區內睇定,射個靚遠柱波入網,意大利落後至0:2。

輸到兩球,意大利侷攻但毫無板斧,只靠基艾沙單打獨鬥,最接近入波一次,只係瑞士後衛疏忽,頭槌解圍誤頂回自己龍門,但又中柱彈出。意大利喺全場欠缺一個大威脅攻門情況下,輸0:2出局。

意大利一戰寫下3個羞家紀錄,佢哋自2004年後首次未能闖入歐國盃8強,31年來首次輸畀瑞士,連續8場歐國盃有失球,創造咗隊史最長紀錄,加上近兩屆世界盃都冇份入決賽周,令人對呢支曾叱吒風雲球隊,感到唏噓。

瑞士最後一場分組賽,幾乎爆冷擊敗德國,該仗並非撞彩,紅衫軍真係有實力,今場表現更有進步,紥紥實實淘汰意大利。保持住呢種速率同攻守機動性,8強無論對英格蘭或斯洛伐克,瑞士都有再進一步機會。