【歐國盃】鐡血防線 完場前世紀撲救!土耳其淘汰最強黑馬 奧地利21次射門悲慘出局

最強黑馬被淘汰,狂射21次都只能16強止步。周三凌晨奥地利以1:2不敵土耳其,後者8強戰將會師荷蘭。

奧地利於分組賽帶嚟最大驚喜,力壓荷蘭、法國首名出線,被視為最強黑馬。前曼聯領隊蘭歷克調教有道,進攻組織快而準,但今仗臨門一腳欠佳,換嚟慘痛結果。奧地利全場21次射門只入一球,反觀土耳其只有5次,已有2球進帳。

土耳其賽前被睇淡,但開波58秒即開紀錄,後衛美列迪美羅助攻得手,創造歐洲盃淘汰賽史上最快入球。世界盃相同紀錄亦由土耳其保持,2002決賽周季軍戰,著名中鋒哈根蘇古入首球,時間只係11秒。

之後就係奧地利世界,控制中場,展開一浪接一浪攻勢,但就係冇波入,最接近數中鋒阿拿奧杜域單刀射門,但被土耳其門將梅特古洛克神勇撲出。

屢攻不入,奧地利59分鐘再受教訓,今次又係輸角球,美列迪美羅梅開二度。陷入絕境,蘭歷克改用雙塔陣直接攻門,中場基列斯治66分鐘追成較接近紀錄,又係來自角球,今場3個入波,全部由角球產生。

土耳其一路死頂,但形勢越嚟越危險,似有被追和加時之勢。補時階段,幾乎最後一個攻勢,奧地利近門頭槌,彈地波睇怕必入,但竟然被梅特古洛克一個飛身托出,比錫達斯門將呢個世紀撲救,保住土耳其勝果。完場笛響起,奧地利球員頹晒,好多更倒地不起,今屆黑馬就此行人止步。

土耳其8強對荷蘭,周日凌晨3時開波,英格蘭同晚凌晨零時對瑞士,勝方將會師4強。另一線德國對西班牙,周六凌晨零時上演,葡萄牙對法國係周六凌晨3時。