【歐國盃】西班牙反勝法國;16歲天才完勝麥總!神入球破比利66年紀錄 耶馬:慶祝17歲生日

天才少年神級入球,麥巴比黯然無光!周三凌晨4強,耶馬以16歲362日,得出一個改寫歷史嘅世界波,協助西班牙以2:1反勝法國,殺入周一凌晨決賽,屆時耶馬剛滿17歲。

8強淘汰德國,西班牙付出極大代價,中場柏迪被踢傷,右後衛卡拿積領紅,對德國時入替柏迪,取得入球兼助攻嘅丹尼爾奧莫,順理成章做正選。較令人擔心嘅係右後衛,老將捷西斯拿華斯擔正,法國亦吼準呢點,麥巴比去佢最擅長嘅左路,頻頻爆破拿華斯,中間用高路梅安尼衝刺。

開波前有記者問迪甘斯:「好多人話法國悶死人喎!」呢位法國領隊答得好晦氣:「嫌悶咪唔好睇囉!」。結果同決賽周前5場相比,法國踢得進取好多,開波8分鐘由麥巴比傳送遠柱,高路梅安尼頭槌破網。法國領先1:0,並終於得到決賽周至今首個運動戰入球。

計年紀,拿華斯可以做耶馬老竇,耶馬見老竇被恰,21分鐘發揮天才射術,禁區外用左腳內側射入世界波,為西班牙扳平。丹尼爾奧莫25分鐘又有士哥,突入右路禁區射遠柱,西班牙反先2:1完上半埸。

法國下半場換入基沙文、巴哥拿等攻擊球員,加上西班牙轉為保守,縮後打防守,令法國取得唔少攻勢,但前鋒配合唔理想,麥巴比亦欠缺銳利,即使最後階段換入基奧特,亦無力挽回敗局。最終西班牙創紀錄6連勝殺入決賽,周一凌晨同荷蘭或英格蘭爭冠軍。

耶馬一射驚天,整體表現亦優秀,當選今場MVP。事實上,呢位天才今屆連環破紀錄,歐國盃最年輕上陣、最年輕助攻球員,今場對法國正選,打破巴西球王比利喺1958年世盃創下嘅大賽4強上陣紀錄(17歲244日);加埋耶馬入波(16歲362日),除咗成為歐國盃決賽周史上最年輕入球球員,仲破埋比利嘅大賽入球紀錄(17歲239日)。

耶馬會喺今個星期六(13號)迎接17歲生日,啱啱喺歐國盃決賽之前,如果耶馬幫西班牙贏埋冠軍,就會成為歐國盃史上最年輕冠軍。耶馬賽後話:「今次夢想成真!我嚟德國係要贏比賽,然後同隊友慶祝17歲生日!」