【歐國盃】英格蘭繼續一盤散沙 和波首名出線 球迷睇到火滾 向修夫基掟樽

總身價15.2億歐元,依然唔識入波。周三凌晨歐國盃C組最後一輪分組賽,英格蘭只能0:0悶和斯洛文尼亞,但依然能以5分首名出線,16強避開「死亡區域」。

同組丹麥亦以0:0和塞爾維亞,同斯洛文尼亞都係3分,兩隊計盡對賽、得失球、入球、失球以至黃牌數都相同,結果史無前例,要藉兩隊外圍賽咁啱同組成績計算,結果丹麥第2名,斯洛文尼亞則成為其中一隊最佳第3名,歷史性打入16強。

英格蘭有運,如果丹麥今場贏,佢就會跌落第2名,走入上線,名乎其實「死亡區域」,16強先對德國,跟住仲有西班牙、葡萄牙或法國,依家走入下線,暫時強隊只有意大利,之後就要睇只能小組第3出線嘅荷蘭,會唔會被編落下線。

英格蘭即使總身價最高,但踢落依然一盤散沙,攻勢軟弱無力,未對斯洛文尼亞構成重大威脅。兩大核心哈利卡尼、祖迪比寧咸繼續隱形,加上戰術保守,睇到球迷瞌眼瞓。下半場看台不斷有噓聲,完場後更有人向領隊修夫基掟樽,發洩不滿。

事實上,C組6場波加埋只得7個入球,有球迷斷言嘥咗好多寶貴瞓覺時間。哈利卡尼賽後話,英格蘭喺淘汰賽就會真正嚟料,聽住先喇!