【歐國盃】英格蘭熱身3:0贏波斯尼亞;彭馬伊斯有料到 仍要踢走6人 修夫基晒命:幸福的煩惱

歐國盃香港時間下周六凌晨開波,奪標熱門之一嘅英格蘭,亦進入最後備戰階段,周二凌晨喺聖占士公園球場同波斯尼亞踢番場熱身賽,半力出擊下大勝3:0,睇嚟好弗吓喎。

呢場熱身賽目的之一,係畀領隊修夫基練兵、選出最後26人名單,因為佢個32人初選名單,選入唔少新人,其中高爾彭馬同伊比爾治伊斯,今仗都係第一次為英軍踢正選,而且都有好表現,彭馬仔更攻入1球,得到基哥大讚:「喺選人方面,我真係有幸福的煩惱!」

英格蘭今場由今季喺維拉踢到曉飛嘅屈堅斯做正箭頭,伊斯、高爾彭馬、查洛保雲支援,上半場無紀錄,去到換邊後60分鐘,安斯干沙禁區內被拉跌,彭馬仔操刀12碼開紀錄。85分鐘,打正選中場嘅阿諾,禁區內窄角度窩利抽入成2:0,完場前後備入替嘅卡尼門前補中埋齋,英軍大勝3:0。

今場好多非常規正選主力獲得上陣機會,車路士天王高爾彭馬,水晶宮中埸伊斯,都係首次為三獅兵團正選披甲。彭馬仔延續做首席劊子手嘅角色,左翼伊斯亦表現搶眼,3次盤扭成功屬全場最多,7次單對單對抗成功排全隊第2。

修夫基賽後特別點名讚佢兩個:「彭馬前場串連做得非常好,好開心佢有波入。伊斯表現亦好,盤球突破有威脅,我好滿意。」英軍初選名單共33人,修帥最後要踢走6人,選出最終26人歐國盃大軍名單,佢話:「打完今場波,我定最後名單有幸福的煩惱,但咁係好事,證明我班國腳有料到。」