【歐國盃】英格蘭揼半場波鐘 1:0挫塞爾維亞;新王比寧咸又入波:習慣咗皇馬踢法

大熱門出場!英格蘭喺周一凌晨C組首輪賽事,憑祖迪比寧咸建功,1:0小勝塞爾維亞。呢位20歲後生仔,將全能中場角色發揮得淋漓盡致,依家嘅佢,似球隊領袖多過哈利卡尼。

今次英格蘭真正頭重尾輕,今場除哈利卡尼、科頓、薩卡打正選,仲有艾雲東尼、查洛保雲、哥頓、伊比爾治伊斯、奧尼屈堅斯、彭馬6大鋒將;加上超級後上王比寧咸,仲用埋侵略性較強嘅阿歷山大阿諾特打正選中場,牌面攻擊力的確夠照。

英軍一開波就控制戰果,但並唔急進,直至13分鐘先有首個射門,但即刻轉化成入球。基爾獲加一個通透直傳,薩卡右路落底傳中,哈利卡尼走前柱引開對手,比歷咸後上飛衝頂波破網,英格蘭開紀錄。

塞爾維亞陣中最有卡士係一對前鋒,曾効力富咸嘅大隻中鋒阿歷山大米祖域,以及祖雲達斯中鋒杜辛華荷域,但隊友面對英軍強大中場控制力,給予唔到支援。上半場較有威脅係米祖域藉對手失誤,喺禁區外有射門機會,但未能命中目標。

下半場膠著,雙方射門機會唔多,哈利卡尼70分鐘曾接應查洛保雲傳中,力壓對手頭槌攻門,但中楣唔入,英格蘭同尋晚意大利一樣咁唔幫手,上半場揸住一粒,下半場唔進取,開出下盤。

英格蘭今場表現唔算突出,但平均質素贏晒,特別係比寧咸不愧皇馬新王,年幾前世界盃已經有料到,喺皇馬浸咗一季,成熟程度大增,已經可以用核心身份帶起晒成隊波,無論攻守都起重要作用,比哈利卡尼更似領袖,佢得20歲仔咋!

比寧咸賽後受訪,不忘感謝皇馬:「塞爾維亞係一支好硬淨嘅球隊,但我哋已努力做好準備,取得好開始。我習慣咗後上入禁區、同埋去邊線拎波,呢個係喺皇馬養成嘅習慣。」

20歲嘅比寧咸已經參與咗3屆大賽,上屆歐國盃曾3次後備上陣,但去到2022世界盃、今屆歐國盃,比寧咸都係首位幫英格蘭入波嘅球員。上屆世界盃首戰對伊朗,佢用頭槌先開紀錄,最終大勝6:2。

C組另一仗,丹麥同斯洛文尼亞和1:1,令英格蘭以3分帶頭。第二輪賽事,分別係周五凌晨零時丹麥對英格蘭,周四晚9時塞爾維亞對斯洛文尼亞。