【歐國盃】考試合格踢波更醒!16歲耶馬製造關鍵助攻 西班牙反勝格魯吉亞 8強決戰德國

16歲天才耶馬,製造關鍵助攻,助西班牙於周一凌晨16強賽事,4:1反勝格魯吉亞,將於周六凌晨8強大戰德國,上演強強對決。

周一凌晨頭場,英格蘭補時最後一刻追和,加時反勝斯洛伐克,直情係漫畫魔幻情節。第二場你以為冇得揮之時,點知係激到暈嘅好波。

西班牙分組賽3戰3勝,展示強大攻力,對住格魯吉亞,繼續君臨城下,開波15分鐘內,控球比率超過80,射門共7次。格魯吉亞死頂不失,18分鐘先至第一次過到西班牙後半場傳波,即𨍭化入球。米卡達捷右路快放,傳彈地波入禁區,迫到西班牙後衞拿洛文特身體觸球入網,慘擺烏龍。

西班牙上半場共16次射門,失波後曾攻得急躁,但之後定番陣腳,終於喺38分鐘扳平,經左右兩邊回傳後,交到禁區邊洛迪卡斯簡迪,世一防中射出死角波,西班牙半場追和1:1。

下半場一樣精彩,兩位天才展開較量,「格魯吉亞美斯」基華拉斯基利亞,48分鐘喺自己後半場遠程直射,幾乎製造奇跡金球,可惜僅僅出界。西班牙16歲天才耶馬,51分鐘連環出招,先射自由球被門將飛身撲出,跟住又喺右路傳出靚波,遠柱法比安彭拿接應頂入,西班牙終於反先2:1。

耶馬喺決賽周舉行期間,仲要做功課,同時亦收到考試合格喜訊,今仗踢嚟特別醒神,有唔少入波機會,但總係爭些少,仲未能創造決賽周最年輕入球球員紀錄。

格魯吉亞侷攻,後防露出大量空位,西班牙唔客氣,尼高拉斯威廉斯、丹尼爾奧莫分別入波,4:1大勝晉級。全場統計,西班牙數據瘋狂,32次射門14次中目標,鋒力的確無比強大。格魯吉亞球員即使點努力,但遇住咁強勁嘅對手,只能16強止步,已經有晒交代。