【歐國盃】比寧咸球王上身 補時倒掛拯救修夫基!英格蘭加時淘汰斯洛伐克 8強鬥瑞士

英軍新王祖迪比寧咸,一個倒掛金鈎救全家,特別係救修夫基。英格蘭周一凌晨16強,全靠呢位皇馬巨星喺補時最後時刻入波,1:1迫和斯洛伐克,加時後卡尼再發神威,贏2:1晉級8強,將會同瑞士爭奪4強席位。

經過3場分組賽,修夫基同英格蘭,已經成為治療失眠專家,無論幾嚴重失眠症狀,只要睇睇英格蘭比賽,都會藥到病除。除咗專醫失眠,修夫基仲係缷膊專家,佢將頭兩場表現差,賴落阿歴山大阿諾特身上,指佢轉型打中場失敗,拖累祖迪比寧咸、迪勤懷斯,未能盡情發揮。上仗對斯洛文尼亞,下半場用明奴打中場,效果唔錯,去到16強,一於試吓呢位19歲曼聯中場,畀佢做正選。

今場波唔悶,梗係啦,英格蘭一開波就畀對手攻到氣咳,斯洛伐克利用兩邊側擊打快攻,三幾個快馬配合,用速度拉散英格蘭防線,開波10分鐘內已有兩個大餐士,都未能把握。

英格蘭開波唔死得,慢慢攞番主動,但組織攻勢都係慢夾迂迴,即係冇板斧,只有祖迪比寧咸靠個人突破,低頭死去較有威脅,但攻得兩攻,25分鐘終於衰喺對手快攻腳下。

又一次快攻,兩三腳互傳已搞散英軍中堅史東斯、馬克古希,最後由艾雲舒蘭斯近門射入,斯洛伐克出人意表地領先1:0。斯洛伐克之後集中防守,任你點攻,但整個上半場,英格蘭根本冇咩威脅。

哈利卡尼今次決賽周踢得好靜,50分鐘佢突然迴光返照,回復助攻王本色,送個靚斜線畀空晒嘅捷比亞,紐卡素左閘送入中路,畀科頓射入空門。但曼城太子心急走快咗,僅僅越位,慘食詐糊。

車路士天王高爾彭馬坐到腳痹,63分鐘終於出場,右路攻勢當堂生晒,加上斯洛伐克體力下降,英格蘭攻門越嚟越近磅,哈利卡尼頭槌僅僅斜出;迪勤懷斯81分鐘射門,係英軍全場第一次中目標,但又中柱彈出。

補時共6分鐘,修夫基呢個時候先至醒起,後備席有個高大中鋒艾雲東尼,將佢代替科頓,實行大轟炸。去到補時5分鐘,基爾獲加掟手榴彈,馬克古希頭槌跣後,比寧咸再次球王上身,施展倒掛金鈎,最後一刻為英格蘭扳平。

咁都追得和,證明修夫基同佢班總身價達15億鎊球員,即使打唔出應有水準,仍然命不該絕,加時唔夠1分鐘,英格蘭已經後來居上,又係艾雲東尼,賓福特中鋒頭槌二傳,遠柱哈利卡尼頭槌破網,最終呢支奪標大熱贏2:1,驚險過關。