【歐國盃】格魯吉亞贏葡萄牙 歷史性入16強 一夜創造兩大紀錄!上線超死亡區域 5名牌會師

足球又一奇跡夜,「格魯吉亞美斯」搶晒C朗鏡。

人口只有370萬,小國格魯吉亞周四凌晨F組最後一輪分組賽,2:0挫賽前已肯定首名出線嘅葡萄牙,以最佳小組第3名之一資格出線。同組土耳其2:1贏捷克,次名晉級。

今次係格魯吉亞歷史上首場歐國盃決賽周勝仗,同時首度打入16強,一夜創造兩個紀錄。雖然16強對西班牙,難再創奇跡,但無論如何,小國已取得大勝利。

C朗繼續做正選,希望喺弱隊身上入波,再刷個人紀錄,但依然食白果,今次決賽周仲未開齋。反而「格魯吉亞美斯」、拿玻里前鋒基華拉斯基利亞,開波兩分鐘已單刀開紀錄,全場表現突出,搶盡C朗鏡。葡萄牙今仗用新人,但20歲賓菲加中堅干卡路恩拿斯奧唔爭氣,除交失波導致輸首球外,下半場亦犯規被罰12碼,被格魯吉亞射成2:0完場。

分組賽打晒,16強秩序出籠,上線成「死亡區域」,5大名牌會師。比利時0:0和烏克蘭,只能入埋上線對法國,勝方再鬥葡萄牙或斯洛文尼亞。德國會對丹麥,勝方鬥西班牙或格魯吉亞。

下線黑馬較多,荷蘭只以小組第3出線,但原來有着數,對手係羅馬尼亞,勝方對土耳其或奧地利。英格蘭對斯洛伐克,勝方對意大利或瑞士。如果英意順利過關,8強碰頭,將重演上屆決賽戲碼。

16強秩序(跟開波時間排列)
周日凌晨零時 瑞士vs 意大利
周日凌晨3時 德國vs丹麥
周一凌晨零時 英格蘭vs 斯洛伐克
周一凌晨3時 西班牙vs 格魯吉亞
周二凌晨零時 法國vs 比利時
周二凌晨3時 葡萄牙vs 斯洛文尼亞
周三凌晨零時 羅馬尼亞vs 荷蘭
周三凌晨3時 奧地利vs 土耳其