唔係一_樣呀！曾經教過曼聯嘅德國名帥蘭歷克，今晨帶領奧地利作客1比0贏阿塞拜疆，取得直接出線決賽周嘅入場券，吐氣揚眉！
「逼搶教父」蘭歷克，曾經喺21/22球季出任曼聯看守領隊，由於來頭太大但又成績差勁，更傳出球員喺更衣室士氣低落，被球迷戲稱為「Big腸教父」，令佢英名盡喪。
蘭歷克上年出任奧地利領隊，如常為球注入進攻型逼搶戰術，但效果出奇地好，贏盡奧地利球迷掌聲之餘，更備受球員擁戴，今場賽後記者會，一眾奧地利球員就「踩場」，向蘭歷克淋啤酒慶祝，證明將帥打成一片。
事實上，奧地利今場係殘陣出擊，阿拉巴、阿拿奧杜域齊齊因傷缺陣，好在對手阿塞拜疆唔強，最終奧地利憑另一曼聯棄將沙比薩射入12碼，一箭定江山。
由於同組比利時對瑞典期間發生槍擊案，造成兩瑞典球迷身亡，故比賽腰斬，奧地利目前7戰16分，已領先少踢2場嘅瑞典10分，數字上已確保前2位置，繼2008年、2016年同2020年後，第4次躋身歐國盃決賽周。
今屆歐國盃外圍賽，已經有7支球隊已出線，分別為A組西班牙、蘇格蘭；B組法國、D組土耳其、F組比利時、奧地利及J組葡萄牙，連埋東道主德國，出年決賽周24席已經有8支球隊誕生。
