【歐國盃】小組第3原來執筍嘢!羅馬尼亞後防弱雞 加普爆發 荷蘭蟲變龍 大勝入8強

喺羅馬尼亞有心冇力嘅情況下,荷蘭周三凌晨16強大勝3:0,輕鬆打入八強。「橙衣兵團」全場23次射門,當中浪費無數機會,反映出羅馬尼亞條防線係幾咁唔掂。

荷蘭分組賽令人失望,只能以小組第3名出線,要對E組首名,點知原來執到筍嘢。E組4隊4分,羅馬尼亞首名,比利時、斯洛伐克2、3名,賴低烏克蘭。烏克蘭睇到羅馬尼亞、比利時喺16強嘅低水準演出,真係激到彈起。

羅馬尼亞嚟到16強現晒型,攻擊球員速度慢,防守亦鬆散,冇高壓逼搶攔截,令荷蘭進攻非常順暢,利物浦前鋒加普20分鐘左路推中爆射得手,領先1:0。羅馬尼亞落後下欠缺反攻能力,荷蘭依然攻勢極多,杜費斯、沙維西蒙斯兩側進襲極有威脅,出現多次危險攻門鏡頭。

迪比浪費大餐士、雲迪積克頂中柱、加普食詐糊,荷蘭一直狂攻,但射極唔入,直至83分鐘,加普喺底線前展現強大身體質素,撞極唔跌,傳個波入中路,馬倫一聲唔該近門建功,呢位多蒙特鋒將補時再建一功,荷蘭喺不斷失機嘅情況下,贏3:0完場。

入球英雄加普,目前共為荷蘭出戰28場比賽,射入12球。其中世界盃5場3球、歐國盃5場3球、外圍8場4球,以及歐國聯7場2球,反而喺熱身賽冇入過波,絕對係大賽型球員。