【歐國盃】寶刀未老!精彩入球壯行色!C朗入兩粒 葡萄牙超靚籤 至少入4強?

寶刀未老!葡萄牙喺歐洲國家盃前嘅最後一場熱身賽,憑基斯坦奴朗拿度梅開二度,主場大勝愛爾蘭3:0,為大賽前夕壯行色!

葡萄牙早前喺熱身賽連鬥芬蘭、克羅地亞,C朗都係缺陣,今場波強勢復出就射入2球,將國家隊入波紀錄增加至130球。C朗已經係國際賽史上最多入波嘅球員,今仗繼續刷新紀錄,賽後當然心情大靚喺IG出post:「偉大嘅勝利,我哋向歐國盃進發!」

C朗今場同里奧及祖奧菲歷斯組成三叉戟,般奴費蘭迪斯支援,後防就有41歲守將比比鎮守。葡萄牙全場佔上風,18分鐘,菲歷斯接應短角球後左腳射入。戰至22分鐘,全場不停跑動嘅C朗射罰球,可惜省中人牆再中柱,半場葡萄牙領先1粒。

下半場C朗Show Time,佢喺50分鐘假身擺脫敵將,再起左腳射遠柱得手,10分鐘後,佢又接應祖達橫傳撞射,將紀錄改寫成3:0。

葡萄牙喺歐國盃首仗係19號對捷克,同列F組嘅球隊,尚有土耳其及格魯吉亞,首名晉級應該冇乜難度。睇番晉級圖,葡萄牙若果喺F組首名出線的話,16強對手係A、B、C組嘅第三名;入到8強的話,對手會係D或E組嘅次名,換句話說,去到4強先有機會對其他組別嘅首名,條籤咁靚,葡萄牙今屆會唔會有機會呢?