咁快又輪到佢哋？係呀，相隔8年（嚴格嚟講係7年），歐洲國家盃決賽周又有英格蘭份，不過今次有啲唔同，係合辦。
歐洲足協官方宣佈，2028年歐洲國家盃決賽周將由英國（英格蘭、北愛爾蘭、蘇格蘭、威爾斯）同愛爾蘭聯合舉辦，決賽場地同樣為2020歐國盃決賽周嘅溫布萊。
由於原先有申請主辦2028決賽周嘅土耳其退出，英國、愛爾蘭聯合申辦成為唯一入紙申請，因此自動當選，土耳其會同意大利則合辦2032嘅歐國盃決賽周。
2020年歐國盃決賽周，因疫情順延2021年舉行，當時英格蘭打入決賽，但互射十二碼輸畀意大利，屈居亞軍，估唔到時隔7年，英格蘭又有機會喺主場球迷面前爭取舉起奬盃。
呢場決賽，對英格蘭隊長哈利卡尼嚟講係一大傷痛，2028年佢已經35歲，唔算太老，仍然有機會彌補遺憾。隊長表示：「我會好好保持狀態去迎接2028決賽周！體育界或者足球界，好多人都話30歲應該要plan定退役後嘅生活，但我認為依家足球員進入30歲，只係下半場嘅開始！」
由於今次主辦國涉及歐洲足協5位獨立成員，分別為英格蘭、愛爾蘭、蘇格蘭、威爾斯及北愛爾蘭，呢5支國家隊是否直入決賽周，暫時未有定案，而英國傳媒則指英格蘭傾向參加外圍賽以保持比賽狀態，對自己實力可謂信心爆燈。
