【歐國盃】失12碼 建功 補時失波…神劇情玩殘摩迪 1:1和意大利 克羅地亞9成出局 黃金一代落幕

97分17秒,守唔住最後一個攻勢,克羅地亞天堂變地獄,好大機會悲情出局,以摩迪為首嘅黃金一代,將面對艱難抉擇。

周二凌晨B組最後一輪分組賽,意大利藉全場最後一個攻勢,後備薩卡尼射出圓月彎刀式入球,1:1迫和克羅地亞,3戰4分次名出線,16強對瑞士。西班牙1:0小勝阿爾巴尼亞,3戰全勝首名晉級,下仗對手待定。

克羅地亞既有悲情,亦有神劇情,事關佢吔54分鐘,曾經獲得12碼,雖然摩迪主射被救出,但只係1分鐘之後,呢位中場大師立即近門執死雞射入,完成自我救贖,並以38歲289日,成為歐國盃史上最年長入球球員。

克羅地亞領先後,相對更控制戰局,意大利攻力麻麻,主攻威脅更細,反而幾乎畀克羅地亞拉開紀錄。今場補時達8分鐘,就喺克羅地亞勝利在望之際,意大利谷埋最後一道氣,中場中路硬爆向前,個波最後去到左路K角位禁區邊,効力拉素嘅左翼薩卡尼扮演後備神兵,盪射遠柱入網扳平。

入球時間97分19秒,唔使再喺中圈開波,立即吹雞完場,克羅地亞由4分直接出線,剎那間只得2分,由第2變第3,想成為4支最佳第3名球隊之一,從而晉級16強,機會相當之微。

摩迪賽後激動掩面,難以接受殘酷命運,以佢為首嘅黃金一代,之前兩仗被評老化,背水一戰又欠運,功敗垂成,應該要到換代時候。