【歐國盃】大師一劍封喉 比利時贏羅馬尼亞2:0;4隊同分點搞法 盧卡古同VAR有仇

周六歐國盃E組賽事,比利時以2:0擊敗羅馬尼亞,兩輪比賽後4隊同得3分,成為今屆最激烈小組。比利時奇雲迪布尼今仗回復大師級水準,掌控中場兼入波,成致勝關鍵;佢隊友盧卡古就慘喇,又食詐胡一個,真正地獄黑仔王。

比利時上場爆冷0:1不敵斯洛伐克,但今場只用73秒就先開紀錄,維拉中場泰利文斯禁區頂勁射得手,領先1:0。63分鐘,迪布尼交出美妙直線,盧卡古射入,但黑仔「體毛越位」又食詐糊。80分鐘,迪布尼接應門將超長傳,趕喺對方門將出迎前射入,最終比利時贏2:0。

比利時今場打開今屆勝利之門後,代表E組4支球隊2輪後各得1勝1負,同得3分,目前以得失球差分排名,羅馬尼亞排榜首,比利時第2,斯洛伐克同烏克蘭分別排第3和第4。最後一輪賽程係羅馬尼亞對斯洛伐克,比利時對烏克蘭,如果和晒,羅馬尼亞、比利時直接出線,斯洛伐克睇吓有冇最佳第3名資格,烏克蘭最慘,同得4分但會出局。

迪布尼除攻入1球外,亦交出3次關鍵傳球,更加頻頻單對單過人,有返中場大師風範,佢一嚟料,成隊比利時當堂生晒,可惜仲有隻黑腳,阻擋住啲旺勢。

盧卡古肯定係今屆歐國盃地獄黑仔王,首輪對斯洛伐克已兩度食詐糊,嚟到今場,佢曾經單刀射爆羅馬尼亞,正慶祝開齋之時,VAR通知球證入球人士體手越位,盧卡古上演詐糊3連發。