【歐國盃】咁至係冠軍相!西班牙圍揼意大利 2戰全勝首名出線;敢用新人叻過基gor多多聲

呢隊的確有啲冠軍相,起碼好過英格蘭多多聲。周四歐國盃B組上演強強對決,由西班牙大戰意大利,最終狂牛小勝1:0,2戰全勝提早鎖定小組首名出線。

睇完之前英格蘭1:1和丹麥,今場當堂醒晒,皆因狂牛全場20次射門圍攻意大利,全因對方門將當拿隆馬神勇,先至只係小勝,表現有霸氣,主帥富安迪賽後更寸到話冇球隊可以擊敗西班牙。

西班牙開賽2分鐘就有柏迪頭槌被意軍門將救出。之後時間西班牙一直圍攻對手,戰至55分鐘終有入球,尼高拉斯威廉斯傳中,摩拉達觸球改變方向後,門將當拿隆馬飛身拍出,個波省中卡拉科利變烏龍波入網,狂牛就憑呢球贏1:0,以6分首名出線。

表面強強相遇,踢落強弱懸殊。西班牙好有霸氣,上半場已有9次射門,20次射門共9次中目標。至於意大利只得4次射門1次中目標,創球隊自1980年後喺大賽最少射門紀錄。

西班牙領隊富安迪相當抵讚,對住意大利呢啲高質對手,仍然敢用16歲嘅耶馬打正選,佢同21歲尼高拉斯威廉斯,一左一右不停進襲意大利防線,帶嚟極大威脅。

相比之下,英格蘭對住丹麥,喺暮氣沉沉之下,領隊修夫基仍然唔用高爾彭馬等弗爆後生仔,實在太保守,抵畀人閙。