【歐國盃】名將之後112秒入波 葡軍反勝;C朗6戰Euro創歷史 捷克教頭寫個服字

39歲134日,第6次參加決賽周,C朗周二凌晨打破兩個歐洲國家盃歷史紀錄,雖然佢曾錯失單刀,但葡萄牙仍憑後備神兵法蘭斯高干斯卡奧,補時入球2:1絕殺捷克,於F組先拔頭籌。

除咗C朗,葡軍正選仲有一個老將,後衛比比更加係41歲134日,成為決賽周最大年紀出場球員。兩位老將依然有心有力,令人尊重。當中C朗職業生涯一共參加5屆世界盃(2006、2010、2014、2018、2022),6屆歐國盃(2004、2008、2012、2016、2020、2024),佢亦係參加主要國際大賽最多嘅歐洲球員。

葡軍實力凌駕捷克,上半場全面控制戰局,拉菲爾利亞奧左路進攻好搶眼,但黃金機會仍來自C朗,佢曾經接應般奴費南迪斯直傳單刀,但射門被捷克門將真迪治史坦歷救出。

捷克擺明死守,聯防密集亦做得唔錯,令葡軍雖然擁有極高控及傳球率,依然老鼠拉龜,反而喺62分鐘被普禾特世界波射爆,落後0:1,呢個亦係捷克全場第1次射門。

葡軍9分鐘後扳平,紐奴文迪斯頭槌頂入中路,雖然冇乜威脅,但真迪治史坦域接波甩手,彈落隊友腳下入網。葡軍憑烏龍波追和後,曾有迪亞高祖達執死雞得手,但VAR判C朗越位在先食詐胡。去到90分鐘,葡軍換入法蘭斯高干斯卡奧,21歲波圖前鋒入場只有112秒,即乘對手中堅解圍失誤,近門射入,助葡萄牙2:1險勝捷克。

法蘭斯高干斯卡奧個名係咪好熟?冇錯,佢爸爸就係當年葡萄牙「黃金一代」嘅名將干斯卡奧,佢同費高、雷哥斯達係好拍檔,曾56次代表葡萄牙國家隊,代表作係2000年歐國盃分組賽、對德國連中三元,助國家隊大勝對手,當屆葡萄牙亦殺入4強。

至於曾有機會製造驚天冷門嘅捷克領隊夏錫,賽後就公開激讚C朗:「C朗今場再次展示自己嘅天才,佢做足前鋒嘅本份,仲製造咗唔少機會,以佢嘅年紀,真係難以置信,我要向呢位足球史上最佳球員致敬。」

同組土耳其3:1挫格魯吉亞,兩隊快上快落好好睇,全場最靚入球,來自艾達古拿嘅世界波,令土耳其再度領先。艾達古拿効力皇家馬德里,呢位天才攻擊中場只有19歲114日,成為歐國盃史上地標戰最年輕入球球員,打破C朗紀錄。(19歲128日)