【歐國盃】加時冇12碼掀爭議;德國慘負西班牙1:2 卻奧斯茅王上身 踢到抽筋 遺憾掛靴

最精彩8強戰,周六凌晨德國千苦萬苦,法定時間1:1迫和西班牙,加時佔優勢反而輸1:2出局,一代中場卻奥斯亦宣告退役。

薑係老嘅辣,西班牙球員荷西路賽前話,希望呢場係卻奧斯足球生涯最終戰,之後可以安心退役。34歲德國中場老馬有火,開波後先後用絆馬索、踩腳背對付同位置嘅柏迪,令21歲西班牙國腳踢咗只有7分鐘,已經負傷離場,要由丹尼爾奧莫入替。

兩隊陣容同上仗相近,德國仍然用利萊辛尼做正選,拍根度簡、穆斯亞拿,支援單箭頭夏維斯;防中出多蒙特嘅安利簡,代替利華古遜主力安特列治。

今場唔係決賽,勝似決賽,兩隊晉級過程表現最好,深得球迷心,強強相遇亦絕不縮窒,互有攻守,節奏明快。西班牙進攻瓣數多,射門次數佔優,法比安彭拿、尼高拉斯威廉斯都有危險射門,德國夏維斯有次射門亦具威脅,但被門將救出。

16歲耶馬上半場較沉靜,但西班牙開紀錄,又係佢製造助攻,一次右路傳向禁區邊,丹尼爾奧莫後上配合,第一時間射門破網,呢位効力德甲RB萊比錫嘅攻擊球員,51分鐘為西班牙先開紀錄。

德國少帥拿高士文半場已入利華雙將域斯及安特列治,落後之下亦當機立斷,立即換入「新轟炸機」富洛克;西班牙領先後搶迫,及以快攻爭取擴大紀錄,德西進入搏拳階段,高潮迭起。

西班牙領隊富恩特後段心態變保守,先後將耶馬、摩拉達、尼高拉斯威廉斯3個高速前鋒換走,入替球員都欠速度,令德國有更大決心全軍谷上,種落被追和之因。

連老牌前鋒湯馬士梅拿都換入,德國實行最後大轟炸,先有域斯傳中,富克洛臥射中柱彈出;夏維斯藉對手防線失誤,烏尼西蒙企得太出失晒位,笠射空門又高出。直至89分鐘,另一後備米圖斯達特左路傳遠柱,甘美治頭槌頂回中路,域斯一射破網,德國最後階段扳平,加時再戰。

德國加時仍然佔優,有唔少入球機會,107分鐘,穆斯亞拿射門,射中古古列拿手部,球證同VAR都冇判12碼,極具爭議性。西班牙大難不死,反而喺119分鐘由後備米基爾馬連奴頂成2:1。

德國完場前仍有扳平機會,同樣係頭槌,富洛克一頂僅僅偏差,註定德國未有幸運之神眷顧,主辦國打得咁好而8強出局,卻奥斯亦完成最後一戰,退役前留低遺憾。