【歐國盃】前鋒豬隊友 簡迪回春孭飛;法國首仗又係贏一粒 麥總撞頭大出血

熱門初出,又係險勝。法國周二凌晨D組出場,只憑一個烏龍波1:0險勝奧地利,枉費一條豪華攻擊線。較對辦嘅麥巴比亦喺完場前撼到頭,戰衣染紅離場,下場未知乜環境。

法國進攻兵器夠多,對住實力差一皮嘅奧地利,亦唔需要客氣,麥巴比、基士文、奧士文尼迪比利、馬古斯杜林盡出,加埋回勇尼古路簡迪,配合拉比奧特做防中,攻守完整。後備席仲有基奧特、京士利高文、曹亞文尼、卡馬雲加,夠晒豪華。

麥巴比因為要轉會皇馬,上季經常被PSG雪藏,狀態令人懷疑。上半場踢落的確唔係托弗,但速度依然,經常單槍爆破奧地利防線,法國開紀錄一球亦係靠佢。36分鐘,奧地利單刀唔入,法國逃過一劫,38分鐘藉麥巴比連串流暢假動作後傳中,中堅禾巴頭槌擺烏龍,領先1:0。

法國冇學意大利、英格蘭咁,領先後只傳不攻,但馬古斯杜林、奧士文尼迪比利都係豬隊友,成事不足,敗事有餘;麥巴比冇人配合,比賽末段「忍者龜」更撞到頭,流到成身鼻血,未知下仗出唔出得。

法國最終只係小勝1:0,令擁躉咬牙切齒,特別係攻擊球員,除麥總外冇人交到貨。最好波反而係簡迪,今場佢無處不在,一人做兩個人嘢,除咗進攻交靚波,更幾次飛跑回防化解危機,有返早幾年車路士及法國嘅能量。

想再睇簡迪,等周六凌晨3點,法國對荷蘭,兩隊喺D組1戰1勝帶頭,同組波蘭、奧地利周六凌晨碰頭。