【歐國盃】傳奇永不落幕!C朗無私交波畀般奴建功 榮登決賽周助攻王;葡萄牙3:0土耳其 首名出線

39歲C朗再創里程碑,周日F組第2輪賽事,葡萄牙3:0大破土耳其,成功晉級16強。C朗一改獨食作風,唔貪功交隊友入波,令佢成為歐國盃決賽歷史助攻王。

葡萄牙上場險勝捷克,全靠名宿干斯卡奧個仔,法蘭斯高干斯卡奧喺補時後備上陣絶殺,不過星二代今場繼續坐後備席,前鋒仍然係C朗搭拉菲爾利亞奧同貝拿度施華。

土耳其首輪入兩個世界波,3:1贏格魯吉亞,獲一致好評。19歲「土耳其美斯」艾達古拿更打破C朗紀錄,成為歐國盃決賽周入波最年輕球員,但皇馬小妖今場先做後備。收起猛料攻擊中場,土耳其取態相對保守,結果上半場被葡萄牙壓住打,21分鐘已被貝拿度施華攻破大門。

28分鐘,土耳其後防出現超低級失誤,正當C朗鬧緊簡斯路傳得差時,土耳其後衞艾卡耶甸冇望清楚龍門企位就回傳,比恩迪亞回身追唔切,眼白白望住個波流入網,土耳其輸多個烏龍波,形勢極惡劣。

下半場進行到55分鐘,葡萄牙再入一球,C朗有機會半單刀射門,但佢無私交畀位置更好嘅般奴費南迪斯,為葡萄牙射成3:0。C朗又一里程碑時刻,今次係佢個人第8次助攻,追平捷克名將普波斯基,並列歐國盃決賽周歷史助攻王;亦以39歲138日,成為歐國盃史上最年長助攻球員。

C朗一向被指獨食,但作為隊長,呢個波處理冷靜而無私,值得一讃。巨星影響力依然巨大,比賽期間有一位小球迷衝入球場搵偶像,C朗亦同佢暖心合照。到傷停補時,又有一個球迷衝入球場,希望近距離接觸,可見C朗影響力,仍然列世界足球頂端。

除咗C朗,葡萄牙另一老將、41歲比比今場繼續有優異表現,後場殺好多波,抵讚到極。葡萄牙贏3:0後,肯定首名出線,土耳其3分排第2,捷克1:1和格魯吉亞,兩隊同得1分,保持出線機會。周四凌晨最後一輪,葡萄牙對格魯吉亞、土耳其對捷克。