【歐國盃】互射12碼 法國晉級!C朗力不從心 遺憾告別 比比攬實老戰友爆喊;迪甘斯寸爆:入4強已成習慣

一代天王,訣別歐國盃。周六凌晨8強戰,葡萄牙同法國法定時間同加時打和0:0,互射12碼葡萄牙輸3:5,C朗亦完成個人偉大嘅歐國盃歷程。

射輸12碼後,39歲C朗控制住節緒,未有激動,可能經過近兩場淘汰賽,佢亦知道係時候退下。反而C朗老戰友,亦係最後一次參加歐國盃,已經41歲嘅比比,賽後非常傷感,攬住C朗痛哭。

第6次參戰,無論參加屆數、助攻及入球等各方面都係歐國盃王者,2016年亦為葡萄牙捧過冠軍,C朗必然鑄入史冊。但今屆入球交白卷,亦明顯有老態、力不從心,以低水平表現告別,實在係一種遺憾。

雖然各有C朗同麥巴比,但今仗戰情同德國對西班牙比較,相對平淡好多。特別係法國隊,有佢都冇好日子過,凌晨3點開波場次又唔係悶到暈。兩代巨星上半場都冇料到,麥巴比自己爆唔破葡萄牙防線,隊友又冇特別支援;C朗更係連掂波機會都冇乜。最搶鏡仲係拉菲爾利亞奧,左路頻頻落底,做咗葡萄牙進攻重心。

上半場攻門鏡頭極少,下半場較開放,葡萄牙兩次攻門被門將邁治蘭救出,法國亦有曹亞文尼、高路梅安尼錯失黃金機會,兩隊要進入加時。

C朗全場沉爆,到下半場尾段跑動都已經慢晒,但領隊馬天尼斯要同C朗共存亡,到加時初段仍然冇派祖達同祖奧菲臘斯上陣。反而41歲中堅比比依然堅挺,下半場尾段法國後備馬古斯杜林硬爆,比比同佢狂奔一段,最終成功解圍,真係寫個服字。

加時上半場,法蘭斯高干斯卡奥傳中,C朗罕有得到機會近射,一飛冲天。麥巴比之後推入禁區勁射,比比又瞓身解圍。加時下半場,麥巴比因傷被換走,由巴高拿入替;葡萄牙亦以祖奧菲歴斯,代替跑到莫晒氣嘅利亞奧。最後兩隊都係互無紀錄,要互射12碼。

C朗繼續第一射,入咗,但祖奧菲歷斯宴客,法國5射皆中,繼續醜陋晉級,4強對西班牙。決賽周踢到第5場,法定時間加時,法國只係入咗1個12碼,同對手送兩個烏龍,運動戰仲未有波入,更浪費觀眾好多寶貴睡眠時間。

不過法主帥迪甘斯,賽後仍然牙斬斬,話闖入大賽4強係國家隊習慣:「晉身4強已經成為我哋嘅習慣,當然,呢個唔係理所當然,而係所有球員共同努力而爭取番嚟嘅成就。」法國近5屆大賽,有4次殺入4強,的確係冠絕全球。法國將會喺下周二同西班牙決戰慕尼黑,爭入決賽。