【歐國盃】主辦國有着數 德國爭議聲中贏匈牙利 率先入16強;瑞士美斯又入波 同麥湯鬥搶Fo

周二凌晨歐國盃決賽周,兩場A組第2輪賽事落幕,德國主場有被偏幫嫌疑,憑一個問題球先開紀錄,最終2:0贏匈牙利,2戰2勝率先出線。至於瑞士則由32歲嘅沙基利射入世界波,1:1迫和蘇格蘭,揸住4分,99%可以出線。

作為主辦國,德國首仗5比1大炒蘇格蘭,但今場對住匈牙利,踢落辛苦好多,開波10幾秒已幾乎落後,好在龍門紐亞救出對手單刀近射。紐亞全場作出3次關鍵撲救,今場係佢第17次喺歐國盃決賽周上陣,追平咗普方紀錄。

德國22分鐘開紀錄,但好有爭議性,當時德國進入禁區攻門,根度簡後插上冇搶到波,身體接觸後撞跌瑞士後衞韋利柯賓,藉匈牙利防線呆一呆,根度簡再交畀穆斯亞拿射入。VAR介入,但球證仍示意入球有效,德國領先1:0。匈牙利演出比上仗1:3負瑞士時大有進步,但先輸問題球,再畀根度簡喺67分鐘射成2:0,結果輸多場,出線機會微乎其微。

同匈牙利一樣,蘇格蘭第二輪表現好咗好多,13分鐘已經由麥湯文尼先開紀錄,佢喺領隊奇勒麾下已經入咗9球。但26分鐘,蘇格蘭後衞失誤,畀瑞士單箭頭梳頓沙基利截到,跟手射入一個世界波扳平。

32歲嘅沙基利,曾被稱為「瑞士美斯」,球會功跡一般,但每隔兩年,就會喺世界大賽嚟料。據統計,佢喺大賽已入10球,其中歐國盃10場5球、世界盃12場5球,成為第7位喺世界盃同歐國盃都入過5球球員,之前6位係柏天尼、奇連士文、施丹、亨利、C朗、盧卡古,亦係唯一一位喺近6屆大賽(2014世界盃至2024歐洲盃)都取得入球嘅歐洲球員。

自2014年世界盃以來,瑞士喺國際大賽一共射入32球,沙基利直接參與其中44%;現時効力芝加哥火焰嘅佢,亦成為首位喺歐國盃入波嘅美職球員。瑞士依家1勝1和得4分,基本上穩入16強,沙基利大有機會延續入球紀錄。