【歐國盃】一夜4神救!葡萄牙年輕門神做國家英雄!迪奧高哥斯達救埋C朗比比

加時上半場,時間係105分鐘,葡萄牙千辛萬苦迫得12碼,C朗主射,竟然被斯洛文尼亞門將奧比歷救出!最終兩隊打和0:0,互射12碼葡萄牙贏3:0,全靠迪奧高哥斯達3連救,C朗執番身彩,唔駛臨尾做歷史罪人。

葡萄牙晉級8強,救番C朗,全靠効力波圖嘅門將迪奧高哥斯達,佢救晒斯洛文尼亞頭3輪12碼,成為晉級英雄。迪奧高哥斯達今年24歲,係波圖青訓產品,2020/21年球季升上A隊,21年首度入選大國腳,今年奠定國家隊首席門將地位。

迪奧高哥斯達唔單止拯救39歲C朗,亦救番另一老將比比,呢位41歲中堅喺加時下半場尾段犯超低級失誤,畀斯洛文尼亞一個單刀機會,全靠門神用腳閂出,力保不失,葡萄牙先有機會互射12碼,贏出咁戲劇化嘅16強大戰。

葡萄牙今場20次射門,其中C朗佔大多數,包括下半場一次半單刀,都係徒勞無功。事實上,隊友一直餵波,供應源源不絕,令C朗成為今屆決賽周到目前為止,射門次數最多球員。但畢竟盛年已過,C朗再非昔日C朗,唔入就係唔入。

加時階段,C朗105分鐘獲得射12碼機會,但被奧比歴飛身撲出。呢個宴客令C朗情緒崩潰,加時半場休息時爆喊,要隊友安慰。到互射12碼,佢承擔首射責任,幸好頂住千斤壓力射入,之後般奴費南迪斯、貝拿度施華亦分別得手,葡萄牙得以晉級,周六凌晨3時8強大戰法國,C朗可唔可以打番場爭氣波,KO麥巴比?

斯洛文尼亞絕對係光榮出局,連3場分組賽,4場波法定時間都保持不敗。如果加時下半場能把握比比失誤,射入單刀波,已經可以爆大冷,但無奈遇正葡萄牙門神上身,同前一晚斯洛伐克命運相同,同歷史性8強席位,遺憾擦身而過。