今晚歐國盃外圍賽A組生死戰，挪威喺主場硬撼西班牙。目前挪威6戰10分，落後榜首蘇格蘭5分、以及落後5戰10分嘅西班牙，由於每組得頭兩名直接出線，換句話說，挪威今仗係非勝不可。
挪威擁有英超爭冠孖寶奧迪加特同夏蘭特，不過其餘隊友狀態唔算穩定，尤其首循環3戰得1和2負，瘋狂失分，以至依家陷入出線危機。
挪威喺首循環作客西班牙慘吞3蛋，不過嗰場夏蘭特因傷缺陣，如今挪威夫添出擊，教練蘇巴堅亦信心爆燈：「經過上場，我哋已經學識點樣為西班牙製造困難，其實嗰次我哋都有5、6個機會。我哋仲知道，如果我哋組織得唔好，西班牙就會完全主宰球賽。」
雖然蘇巴堅講到好似好有計咁，但西班牙平均質素始終高啲，而且佢哋仲有兩位悍將熟晒夏蘭特路，佢哋就係季前轉戰沙特嘅拉樸迪、以及曼城真核心洛迪。
拿樸迪同夏蘭特超級老友，今年6月結婚，夏蘭特畀足面，係少數有出席婚禮嘅曼城球員，不過今仗各為其主，私人感情當然放埋一邊，拉樸迪話：「首循環挪威冇夏蘭特，今場有，情況會好唔同！係，佢速度堅快、爆發力強，但我有方法凍結佢，例如縮窄佢嘅跑動空間咁。」
至於洛迪，今季更加大熟大勇，曼城冇咗佢嗰4場波全部輸晒，已經說明一切。再者，洛迪熟晒夏蘭特路，佢喺中場亦鬥慣奧迪加特，賽前揚言有信心可以搞掂挪威，切斷晒夏蘭特嘅供應。
事實上，西班牙唔止中後場硬淨，前面嘅摩拉達近期狀態亦弗到爆，今場個客W相當值捧。
