C朗寶刀未老、葡萄牙提早入決賽周！今晨歐國盃外圍賽J組賽事，葡萄牙憑C朗梅開二度，主場以3:2擊敗斯洛伐克，7戰全勝、提早3輪攞到決賽周入場券！
38歲嘅C朗又入兩球後，國家隊生涯總共錄得125球，再次刷新男子國家隊最多入球嘅紀錄，而葡萄牙提早3輪取得明年決賽周入場券，亦即係話，呢位隊長只要喺決賽周前無病無痛，就有望成為史上首位6次參加歐國盃決賽周嘅球員，相當厲害。
葡萄牙今場波主場強陣出擊，陣容豪華程度似足世界明星隊，鋒線除咗大佬C朗，仲有PSG嘅干沙路拉莫斯、A米利奧，中場係曼市雙核般奴費蘭迪斯、貝拿度施華。
葡萄牙上半場全場圍攻對手，干沙路拉莫斯頭槌先開紀錄，之後去到28分鐘，斯洛伐克中堅法夫路手球，C朗12碼中鵠，葡軍領先至2:0。
下半場葡萄牙收收哋油，斯洛伐克喺69分鐘追成1:2，不過3分鐘後，C朗即走個靚位，接應般奴傳中撞入；斯洛伐克冇放棄，中場羅博卡喺80分鐘遠射得手，最終葡萄牙贏3:2完場。
C朗生活極有規律，唔單止係超級長青樹，而且愈老愈勇猛，125個國家隊入波之中，有73球係喺30歲之後射入，出年6月喺德國舉行嘅歐國盃決賽周，C朗如非受傷，幾可肯定會入選，有望再次刷新球壇歷史，成為史上首位6次參加歐國盃嘅球員。
賽後C朗受訪，繼續強調自己冇打算退役：「之前有人話我會踢到40、41歲，但其實我冇諗到太遠，亦冇訂下呢啲目標。我會先專注現階段嘅事，因為我依家好享受比賽，身體亦感覺良好。」
另邊廂，F組比利時憑盧基巴基奧梅開二度、盧卡古埋建功，同樣以3:2力剋奧地利，提早晉級決賽周。
