今屆歐國盃決賽周，又冇夏蘭特？今晨歐國盃外圍賽A組，西班牙作客1:0擊敗挪威，鎖定決賽周資格，仲帶挈埋蘇格蘭一齊晉級，換句話講，擁有夏蘭特同奧迪加特呢兩位天才嘅挪威，未能直接晉身決賽周。
西班牙自從換帥後表現大躍進，今場亦係㩒住嚟攻，上半場20分鐘，挪威中堅史查貝治犯錯，原本個波漏入空門就搞掂，不過摩拉達無啦啦加一腳，經VAR審核後判越位在先。
挪威都有反擊力，不過夏蘭特實在係孤掌難鳴，經常被圍，有一次起腳機會亦被熟晒路嘅拉樸迪閂走。下半場，西班牙喺49分鐘打破僵局，挪威球員遲遲未能解圍，結果被加維射入，VAR都搞咗陣，睇吓越位嘅摩拉達有冇影響門將，好彩最終冇事，如果唔係摩拉達又會做千古罪人。
西班牙贏波後，同蘇格蘭喺A組同得15分，由於挪威只剩一場比賽、落後5分，西班牙同蘇格蘭攜手晉級決賽周。
雖然挪威小組賽出局，不過想出席決賽周仲未絕望，就係攞到由歐國聯提供嘅3個附加賽名額。簡單嚟講，來年歐國盃決賽周24個席位，主辦國德國拎咗一個，20個畀外圍賽（10組，每組頭兩名），餘下3個就係附加賽名額。
附加賽資格，係畀歐國聯A、B、C級共12個小組嘅冠軍，如果該歐國聯小組首名已拎到入場券，個附加賽資格就會順延至次名，總之湊夠12隊，再分3組比賽，每組首名就拎到歐國盃決賽周入場券，所以，喺歐國聯B4組有10分排第二嘅挪威，好大機會拎到附加賽資格。
事實上，喺美斯、C朗年代過去後，好多人都認為會輪到麥巴比同夏蘭特鬥爭，不過相比起麥總，夏蘭特嘅國際賽生涯就差好遠，始終隊友質素實在太參差，目前仍然未出席過任何國際性大賽。
