波係圓嘅！迪斯高、史提芬洛域、比真歷又如何？經典魚腩盧森堡創下該國足球歷史，尋晚作客以2:0擊敗波斯尼亞，打破近7次對賽全敗嘅局面之餘，更錄得兩連勝，係該國28年來，首次喺歐國盃外圍賽連捷。
喺歐洲球壇嚟講，以往嘅盧森堡絕對係冇骨魚腩，2006年8月嗰陣，世界排名更曾經跌到第195，但隨住該國一直默默耕耘，如今已有唔少球員外流主流聯賽，包括慕遜加柏中場波基斯辛捷斯。
正正係呢位19歲球員，喺開賽4分鍾，就把握波斯尼亞出錯而先開紀錄。辛捷斯今季喺慕遜只曾出場3次，合共25分鐘，呢個入波，係佢正式比賽嘅第一球。
久攻不下嘅波斯尼亞，喺74分鐘再次大意犯錯，被丹尼辛亞尼偷襲得手，最終輸0:2完場。
盧森堡上仗以2:0擊敗列支敦士登，今場又以相同比數贏埋波斯尼亞，錄得國家隊近28年來第一次兩連勝。盧森堡喺過去60年，唔好話決賽周，甚至只係贏過10場歐國盃外圍賽，其中兩場，就係近呢4日取得。
目前盧森堡喺J組4戰7分名列第3，僅落後第二位嘅斯洛伐克3分。呢個人口只得60萬嘅小國，歷史性晉身決賽周嘅機會，絕對唔係零，加油！
