堅誇張！法國周日凌晨喺歐洲國家盃外圍賽，主場大炒直布羅陀14比0，創出該國國家隊歷史上最大勝仗，更同時刷新歐國外紀錄，至於隊長麥巴比亦破亨利數據，厲害厲害。
領隊迪甘斯賽後被問到，喺頻密賽程之下，有冇必要製造出懸殊戰果？迪甘斯咁答：「我哋係會盡一切努力，去令呢個比數出現！呢個係球員嘅慾望嚟。」法國史上最大勝仗，係1995年贏阿塞拜疆10:0，今次佢哋破自己隊史紀錄之餘，同時刷新埋歐國盃外圍賽最大勝仗紀錄，舊紀錄係德國13:0贏聖馬力諾。
今場最搶眼球員，又係隊長麥巴比，呢位巴黎大哥上演帽子戲法，年僅24歲，就突破足球生涯第300個入球，喺國家隊正賽入咗37球，超越咗亨利嘅34球。
至於17歲嘅薩爾艾美利，係另一備受注目戰將，佢亦都有士哥，為自己嘅國際賽處子戰打響頭炮之餘，亦成為自1914年以來，法國史上最年輕處子戰即有士哥嘅球員。美中不足係佢喺比賽途中受傷離場，初步傷勢應該唔嚴重，不過暫時未知抖幾耐。
睇番B組形勢，同晚荷蘭喺主場小勝愛爾蘭1:0後，亦確定晉級資格，與早已出線嘅法國齊齊出戰歐國盃。I組，羅馬尼亞作客以2:1擊敗以色列，瑞士主場賽和科索沃1:1，羅馬尼亞、瑞士出線。
D組形勢就緊湊得多，由於早場威爾斯只能逼和阿美尼亞1:1，克羅地亞作客以2:0輕取拉脫維亞後，以7戰13分升上次席，領先第3位威爾斯2分，阿美尼亞則只得8分無緣決賽周。
