今晨歐洲國家盃外圍賽，衛冕冠軍意大利悶和烏克蘭0:0後，以C組次名晉級決賽周，主帥史巴列堤放下心頭大石，想爆好耐嘅佢，終於盡情暢所欲言，暗寸前任領隊文仙尼、留低壓力畀球隊後就鬆人！
烏克蘭仍處戰爭狀態，今場比賽喺利華古遜上演，意大利控球同攻勢係比烏克蘭稍多，但係烏克蘭以梅迪歷為首嘅反擊都好有威脅，完場前梅迪歷喺禁區內疑似被撞跌，但球證冇表示，最終雙方悶和0:0，意大利8戰14分，憑較佳對賽成績力壓烏克蘭、次名出線，而烏克蘭則需轉戰附加賽。
由於文仙尼轉教沙特，上季帶領拿玻里橫掃意甲嘅史巴列堤，喺9月臨時頂上，佢領軍後獲3勝2和1負，依家出線埋決賽周，總算完成任務，而佢亦終於鬆一口氣，賽後受訪嗰陣更真情流露。
「諗番之前喺其他賽事發生嘅事，所以我哋一定要晉級，令我哋壓力唔細，而要孭住呢種壓力去比賽，相當唔容易。」史巴列堤口中嘅其他賽事，亦即世界盃，佢講緊嘅係文仙尼之前未能晉身舊年世盃決賽周，所以今次歐國盃，意大利唔可以再衰，以致壓力巨大。
佢繼續話：「我教意大利，就係為咗晉級，而完成任務後，真正嘅工作依家先開始。我想同球員保持緊密接觸，所以唔會等到3月，我嚟緊會周圍去唔同球會嘅訓練中心、同球員共晉晚餐，聽佢哋意見。」
至於同組嘅英格蘭，半力出擊下作客賽和北馬其頓1:1，不過都冇乜所謂，英軍積20分成為C組首名，會同東道主德國、葡萄牙、法國、西班牙及比利時，成為抽籤第一號種子。
