上屆歐洲國家盃冠亞軍，齊齊出師不利！C組英格蘭周六先落後，最終以1:1逼和烏克蘭，至於同組嘅意大利則於領先的情況下，作客被北馬其頓逼和1:1。
英格蘭今場於波蘭中立場出擊，中前場幾近世界明星隊陣容，左邊麥迪臣、右邊薩卡、中鋒卡尼，中場迪勤懷斯、比寧咸及佐敦軒達臣，左閘芝維爾、右閘基爾獲加，係一對中堅削啲，麥佳亞同馬斯古希。
英格蘭甫開賽佔據優勢，不過，烏克蘭卻於26分鐘反擊先開紀錄，辛真高射成1:0。41分鐘，拜仁王牌卡尼交出妙傳，基爾獲加右路後上殺入禁區抽入，英格蘭扳平1:1。
換邊後雖然都係英格蘭佔優，可惜薩卡仔有球起腳中楣，最終雙方賽和1:1。英格蘭雖然全勝走勢斷纜，好彩仍穩佔榜首，踢多一場下領先次席烏克蘭6分。
至於扳平功臣基爾獲加，第77次代表英格蘭，原來呢個先係佢嘅國際賽生涯第一球。睇番英格蘭中前場星光熠熠，但卻要靠後衛入波，今仗有11次射門，但直接威脅唔算太大，可見進攻板斧出咗問題。
領隊修夫基一如既往，排陣及用人又有爭議，雪到硬晒嘅麥佳亞，竟然要帶住23歲、國際賽經驗不足嘅馬斯古希扼守中路，最終亦係麥隊掛住mark古希而失位。至於已轉戰沙特聯賽嘅中場佐敦軒達臣，亦做唔到應有工作，未能釋放比寧咸後上能力，車仔今季唯一可靠嘅史達寧，連名單都入唔到，更成為最大爭議。
修夫基話：「我哋冇可能場場大勝4、5球，今場算係幾好嘅考驗。老實講，我認為球隊踢得唔曳，我哋基本上控制大局，係爭在未能創造出有效威脅啫。」
同組嘅意大利亦令球迷中伏，文仙尼劈炮後，足總請咗上季意甲冠軍教頭史巴列堤，可惜佢未能打響頭炮，作客只能1:1賽和北馬其頓。意大利喺舊年外圍賽倒灶輸畀北馬，今仗仍然未能復仇。目前意大利3戰只得4分。
同時，周六晚6場歐國盃外圍賽，除咗F組瑞典作客5:0大破愛沙尼亞，其餘5仗都以和局收場。
