又係C朗！周五凌晨歐國盃外圍賽J組，葡萄牙即使已篤定出線，但依然強陣出擊，最終憑C朗及簡些路建功，作客以2:0輕取列支列支敦士登，分組賽9戰全勝，以最強氣勢進軍來年決賽周。
葡萄牙前8場分組賽都贏波，攻入32球、失2球，早已拎到決賽周入場券，霸氣十足。不過今次面對魚腩列支敦士登，葡軍依然徵召最強人腳出擊，干卡路拉莫斯、祖奧菲歷斯拍住C朗攻堅，迪亞高祖達、般奴及貝拿度施華等球星俱在陣中。
葡萄牙全場圍攻，但上半場14次埋門均無功而還，當中C朗就已起腳7次。上半場熱晒身後，換邊後僅兩分鐘，C朗接應祖達直線，喺禁區左路起腳，列支敦士登門將欲救無從，葡萄牙終於打開紀錄。
10分鐘後，簡些路接應長傳，扭埋棄關出迎嘅門將及後衛，喺禁區底線附近射入空門，葡萄牙輕鬆領先2:0，之後菲歷斯、干卡路拉莫斯入波均被吹越位，最終葡萄牙保持勝局，錄得外圍賽9戰全勝佳績。
C朗入波後，今屆外圍賽已入第10球，與比利時盧卡古並列射手榜第一位，同時，佢亦係史上第一位喺38歲、為國家隊射入10球嘅球員，繼續刷新球壇歷史。
