【歐國外】分組賽完結 摩笛上尾班車;決賽周下月抽籤 隨時出現英丹荷意死亡之組!

經過周四凌晨最後一輪外圍賽後,明年歐洲國家盃決賽周24個席位,已經產生21隊,剩下3個席位,將於明年3月舉行附加賽後產生。

今晨焦點去咗D組,大部份球迷都期待克羅地亞可以搭上尾班車,睇到38歲摩迪嘅最後一舞。結果克羅地亞總算冇令球迷失望,前鋒安迪布迪美亞一箭定江山,以1:0擊敗阿美尼亞,取得小組次名出線資格。

克羅地亞晉級,意味住38歲隊長摩迪,仲有機會挑戰最後一次國際大賽冠軍。過去兩屆世盃,摩迪協助克羅地亞獲得亞軍及季軍,今年6月歐國聯決賽,去到互射12碼不敵西班牙,始終未能登頂,出年歐國盃決賽周,成為最後機會。

不過,齋睇抽籤形勢,克羅地亞想爆冷可謂困難重重,因為球隊外圍賽成績一般,跌咗落第三檔次。

決賽周分組賽抽籤,會喺香港時間12月3日凌晨舉行,除咗克羅地亞去咗第三檔,就連荷蘭、蘇格蘭都喺呢個檔次,至於丹麥就喺第二檔,衞冕冠軍意大利,更跌落第四檔次,簡單講,即係今屆必定會出現死亡之組,至於邊隊種子隊會咁唔好彩?

今屆種子隊,包括有主辦國德國,以及5支外圍賽最佳成績首名出線球隊,即葡萄牙、法國、西班牙、比利時、英格蘭。最惡劣情況,其中一支種子隊,抽中第二檔次係丹麥、第三檔次無論係荷蘭、克羅地亞或者蘇格蘭,都一定難踢,如果加埋第四檔次意大利,呢個「死亡之組」就精彩到極點囉!

歐國盃決賽周分組賽檔次
第1檔(種子隊): 德國、葡萄牙、法國、西班牙、比利時、英格蘭
第2檔:匈牙利、土耳其、羅馬尼亞、丹麥、阿爾巴尼亞、奧地利
第3檔:荷蘭、蘇格蘭、克羅地亞、斯洛文尼亞、斯洛伐克、捷克
第4檔:意大利、塞爾維亞、瑞士、3支附加賽出線球隊