今朝凌晨歐協聯附加賽首回合，英超嘅韋斯咸終於贏波，以3比1擊敗域堡，而且今夏先來投嘅前鋒施卡馬卡都有波入，成功開齋，總算為新季嘅黑氣沖喜一吓。
韋斯咸開季兩場輸晒，首戰曼城技不如人無話可說，但上場對森林竟然輸0比1，12碼都唔入，注定兩場0士哥，新加盟被寄予厚望嘅意大利國腳施卡馬卡，更被球迷質疑係水貨。
好彩嚟到歐戰，對手較弱，而韋斯咸亦有突破性演出，23分鐘，施卡馬卡頭槌建功打破悶局，下半場64分鐘，查洛保雲整多粒，雖然域堡之後由積及邦迪破蛋，但米查利安東尼奧喺78分鐘入波，鎖定勝局。
韋斯咸今場強陣出擊，明顯係要拎一場勝仗去振奮士氣；一眾新兵包括施卡馬卡、哥尼特、泰路基拿等都有披甲。韋斯咸嚟緊會喺星期日登場，主場迎戰白禮頓。
