歐洲協會聯賽4強次回合，瑞士巴素利主場對費倫天拿，雙方上演超過120分鐘大激鬥，結果費倫天拿補時第9分鐘取得關鍵入球，總比數贏4比3成功殺入決賽，6月7日將會飛到捷克首都布拉格，與英超韋斯咸爭逐殊榮。
費倫天拿首回合於主場輸1比2，故此次回合即全力搶攻以追回失地。上半場35分鐘，費倫天拿比拉基開出角球，阿根廷前鋒尼高拉斯干沙利斯衝前頂入成1比0。
巴素利失守後轉守為攻，踢到55分鐘亦都搵到破門機會，前鋒安度尼接迎長傳後，再於禁區左邊擺脫對手糾纏射成1比1。
以為費倫天拿氣數已盡？但佢哋並無氣餒，繼續進攻，72分鐘，又係尼高拉斯干沙利斯，佢趁巴素利後防解衛失誤，近門補中成2比1，雙方總比數打和3比3，競爭唯有延伸到加時。
兩隊體力都消耗得七七八八，期間出現唔少失誤。當大家以為要以互射十二碼分勝負之際，入球再次出現。
當時已經鬥到補時第9分鐘，全軍退守嘅巴素利睇漏伏兵門前嘅費倫天拿前鋒巴拉克，畀呢位捷克國腳輕鬆射入，下個月初就會返家鄉踢決賽。
費倫天拿今季都算巴閉，唔單止歐協聯入到決賽，意大利盃亦都去到最後階段。「紫百合」先於5月27日同國際米蘭爭奪意盃冠軍，6月7日就會踢歐協聯決賽。
自2000/2001年球季贏過意大利盃之後，費倫天拿就沉寂咗一段極長時間，再無攞過任何冠軍。今次是但贏一個盃都好，相信球迷肯定開心到爆，更何況，其實佢哋係可以爭雙冠添！
