意大利球壇向來吸納唔少塞爾維亞球員，就好似費倫天拿咁，陣中就有3位塞爾維亞外援，除一對後衛尼高拉米連高域及泰列錫之外，仲有25歲嘅盧卡祖域。
今季佢喺「紫百合」表現良好，唔單止協助球隊打到入歐協聯4強，意大利盃亦走到入決賽，相信有機會打破球隊超過廿年嘅冠軍荒。
盧卡祖域於13/14年球季踢貝爾格萊德紅星，3個球季之後就去到葡超賓菲加。初時踢B隊為主，兩季之後就晉身正選隊。可惜出場機會唔多，於17/18年球季就外借到德甲法蘭克福。
去到德國比賽，盧卡祖域突然開竅，首季取得9個入球，18/19年球季就仲喪，全季各項賽事射入27球，其中大炒杜塞爾多夫7比1之役，盧卡祖域當時以20歲之齡個人獨取5球，寫下德甲史上最後生入5粒紀錄。
表現咁搶鏡，自然惹來大球隊垂青。18/19年球季結束後，皇家馬德里就以大約6000萬歐元代價，將盧卡祖域帶到班拿貝球場。以為就此平步青雲，點知佢遇到運動員最大敵人：傷患。
長期受傷患問題纏繞，盧卡祖域出場次數銳減。首季亦即19/20季度，盧卡祖域於皇馬出場27次入得2粒，去到20/21年球季就仲慘，半季出場僅4次兼無入球。
知道入錯貨後，皇馬就將盧卡祖域掟走，於冬天轉會窗外借返成名球隊法蘭克福。無奈演出依然令人失望，完全踢唔番全盛期嘅水平。就連法蘭克福都接受唔到，半季之後就將佢送返畀皇馬。21/22年球季，盧卡祖域喺皇馬坐多個踢，就咁戇居居玩完成個球季。
好彩嘅係，久沉嘅盧卡祖域都有人賞識，費拿天拿今季免費簽佢返嚟，領隊伊泰利安奴畀好多機會佢之餘，仲開始進行改造。由以前於禁區衝鋒陷陣尋找入球機會，改為創造型墮後前鋒。呢次改造，令盧卡祖域受傷次數大減，出場次數回升到正常水平。今季連同各項盃賽及聯賽已上陣超過40次，當中有4個聯賽入球、1個意盃入球及6個歐協聯入球，暫於歐協聯神射手榜並列第1位。
盧卡祖域名義上贏過2次葡超冠軍、2次西甲冠軍以及1次歐聯冠軍。但當中參與成份有幾多，你同我都心中有數。若然今季能夠贏得歐協聯以及意大利盃，對於盧卡祖域嚟講，絕對有意義得多。起碼證明自己努力無白費，有決心喺球員呢條路上繼續打拼。
